ضلع کولگام میں غیر معیاری کھاد کے۴سو بیگ ضبط:ڈائریکٹر محکمہ زراعت

سرینگر///
محکمہ زراعت کشمیر کی انفورسمنٹ ونگ نے منگل کی صبح چھاپہ مار کارروائیوں کے دوران جنوبی کشمیر کے ضلع کولگام میں ایک دکان سے غیر معیاری کھاد کے قریب۴سو بیگ ضبط کئے ہیں۔
ڈائریکٹر ایگریکلچر پروڈکشن اینڈ فارمرز ویلفیئر کشمیر محمد اقبال چودھری نے کہا کہ کولگام میں منگل کی صبح ایک دکان سے کلشیم کلورائیڈ کے قریب۴سو غیر رجسٹرڈ بیگ ضبط کئے گئے ۔انہوں نے کہا کہ مصدقہ اطلاع ملنے کے بعد ہم نے رات کو ہی جگہ کی نشاندہی کی اور صبح کے قریب۶بجے چھاپہ مارا۔
چودھری کا کہنا تھا کہ اس دوران ایک دکان سے کلشیم کلورائیڈ کے قریب۴سو غیر رجسٹرڈ بیگ ضبط کئے گئے جن کو پولیس کے حوالے کیا جا رہا ہے ۔
ڈائریکٹر نے کہا کہ گذشتہ روز سوپور میں غیر معیاری کھاد کے۲سو بیگ ضبط کئے گئے ۔انہوں نے کہا کہ کسانوں کے ساتھ دھوکہ دہی کرنے والوں کے خلاف کارروائیاں جاری رہیں گی۔ان کا کہنا تھا کہ کسانوں کی آمدنی کو دوگنا کرنا محکمے کا خواب ہے جس کو پورا کرنے کیلئے لوگوں کے تعاون کی ضرورت ہے ۔