مرکز‘ آسام سرکار اور الفا کے مابین ایک سہ فریقی معاہدے پر دستخط

نئی دہلی//
مرکزی حکومت ، آسام سرکار اور یونائیٹڈ لبریشن فرنٹ آف آسام (اَلفا) کے مابین نئی دلی میں ایک سہ فریقی معاہدے پر دستخط کئے گئے ۔ اِس معاہدے کا مقصد، شمال مشرقی خطے میں دیرپا امن قائم کرنا ہے ۔ اس معاہدے پر وزیر داخلہ امت شاہ کی موجودگی میں دستخط کیے گئے ۔
اِس موقع پر اظہار خیال کرتے ہوئے ، مسٹرشاہ نے کہا کہ وزیر اعظم کی رہنمائی میں وزارتِ داخلہ نے ایک ایسے شمال مشرق کے خاکے پر کام کیا ، جو انتہا پسندی ، تشدد اور تنازعے سے پاک ہو۔
شاہ نے کہا کہ اس معاہدے میں اَلفا نے ، جو آسام کا سب سے پرانا شورش پسند گروپ ہے ، تشدد کا راستہ ترک کرنے سے اتفاق کیا ہے ۔ انہوں نے کہا کہ۲۰۱۴میں این ڈی اے حکومت کی تشکیل کے بعد سے آسام میں تشدد کے واقعات میں۸۷فیصد ، اموات کی تعداد میں۹۰فیصد اور اغوائکے وارداتوں میں۸۴فیصد کمی آئی ہے ۔
وزیر اعظم نریندر مودی نے ، اِس سہ فریقی معاہدے کے بارے میں کہا ہے کہ یہ معاہدہ ، امن اور ترقی کی جانب آسام کے سفر میں ایک اہم سنگِ میل کی حیثیت رکھتا ہے ۔ ایک سوشل میڈیا پوسٹ میں ، انہوں نے کہا کہ اِس معاہدے سے ، آسام میں دیرپا ترقی کیلئے راستہ ہموار ہوگا۔ انہوں نے اِس اہم حصولیابی میں شامل سبھی کی کوششوں کی تعریف کی ہے ۔