نئی دہلی//کانگریس نے آسام کے وزیر اعلیٰ ہمانتا بسوا سرما کے چار ورنوں سے متعلق بیان کی سخت مذمت کرتے ہوئے اسے منووادی ذہنیت قرار دیا ہے ۔
کانگریس لیڈر ادت راج نے جمعہ کو یہاں جاری ایک بیان میں کہا کہ مسٹر سرما کا یہ بیان کہ شودر کا فرض برہمنوں، کھشتریوں اور ویشیوں کی خدمت کرنا ہے ، بی جے پی کی سوچ کی علامت ہے ۔ بی جے پی نہیں چاہتی کہ پسماندہ، دلت اور استحصال زدہ طبقات مضبوط ہوں اور اس سماج کے لوگوں کو ان کے حقوق ملیں۔
انہوں نے کہا کہ مسٹر بسوا سرما نے ایکس پر ایک پوسٹ کی ہے جس میں ویشیہ، شودر، برہمن اور کشتریہ کی خصوصیات والے لوگوں کے فرائض کو بیان کیا گیا ہے اور کہا گیا ہے کہ شودر ورن کے لوگوں کا فرض ہے کہ وہ اونچی ذات کے لوگوں کی خدمت کریں۔
کانگریس لیڈر نے کہا کہ یہ بی جے پی کی سوچ کا اظہار ہے اور اس بیان کی اصل وزیر اعظم نریندر مودی ہیں۔ انہوں نے کہا کہ مسٹر مودی نے 2007 میں ‘کرمایوگا’ کے نام سے ایک کتاب لکھی تھی۔ انہوں نے کہا کہ مسٹر مودی کو اس بیان پر معافی مانگنی چاہئے ۔
انہوں نے کہا کہ آسام کے وزیر اعلیٰ ہمانتا بسوا سرما کا یہ بیان ان کی ذہنیت کی نشاندہی کرتا ہے جس کا مقصد سماجی ترقی میں دلتوں، او بی سی اور قبائلیوں کی شرکت کو ختم کرکے ذات پات کے نظام کو بحال کرکے آئین کو تباہ کرنا ہے ۔