جموں//
پونچھ کے بفلیاز میں مفرور ملی ٹینٹوں کو تلاش کرنے کی خاطر۱۴سے۱۵ مقامات پر بیک وقت تلاشی آپریشن جاری ہے۔
ذرائع نے بتایا کہ سیکورٹی فورسز نے متعدد جنگلی علاقوں کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔
اطلاعات کے مطابق پونچھ کے بفلیاز میں سیکورٹی فورسز پر حملے کے بعد پیرکو پانچویں روز بھی جنگلی علاقوں میں تلاشی آپریشن جاری رہا۔
ذرائع کے مطابق سیکورٹی فورسز نے۱۴سے۱۵مقامات پر تلاشی آپریشن شروع کیا ہے تاکہ ملی ٹینٹوں کو فرار ہونے کا کوئی موقع فراہم نہ ہو سکے۔
ذرائع کا کہنا ہے کہ بفلیاز کی طرف جانے والی شاہراوں کو بھی فوج نے بند کیا ہے۔معلوم ہوا ہے کہ مسلسل ہیلی کاپٹروں اور ڈرون کیمروں سے جنگلی علاقے کی نگرانی کی جارہی ہے۔
فوجی ذرائع کا کہنا ہے کہ ملی ٹینٹ جنگلی علاقے میں ہی چھپے بیٹھے ہیں جس کے پیش نظر علاقے میں تلاشی آپریشن ہنوز جاری ہے۔
دریں اثنا حملے کے بعد پونچھ ضلع میں سیکورٹی کے کڑی انتظامات کئے گئے ہیں۔
اطلاعات کے مطابق ضلع کی بعض سڑکوں پر ناکے لگا دئے گئے ہیں جہاں لوگوں کی جامہ تلاشی کے علاوہ کارڈ چیکنگ کی جاتی ہے اور ان کے موبائل بھی چیک کئے جاتے ہیں۔انہوں نے کہا کہ ان ناکوں پر گاڑیوں کی بھی تلاشی کی جاتی ہے۔
ان کا کہنا تھا کہ تاریخی مغل روڈ پر بھی کئی ناکے لگا دئے گئے ہیں جہاں آنے جانی والی گاڑیوں کی تلاشی کی جاتی ہے۔
ذرائع کا کہنا ہے کہ تین عام شہریوں کے ہلاکت کے سلسلے میں پولیس اسٹیشن سرنکوٹ میں ایک ایف آئی آر زیر نمبر۳۸۴درج کیا گیا اور تحقیقات شروع کی گئی ہیں۔
فوج نے تحقیقات میں بھر پور تعاون فراہم کرنے کی یقین دہانی کی ہے۔ بعض ذرائع کے مطابق حکام نے راجوری اور پونچھ میں موبائیل انٹرنیٹ خدمات کو معطل کیا ہے۔
اس دوران بفلیاز پونچھ میں تین عام شہریوں کی لاشیں پر اسرار حالت میں برآمد ہونے کے بعد محکمہ دفاع نے۱۳آر آر کے بریگیڈیر کو اٹیچ کیا ہے۔ذرائع نے بتایا کہ تحقیقات بڑے پیمانے پر جاری ہے۔
ذرائع کے مطابق پونچھ کے بفلیاز میں تین عام شہریوں کی لاشیں پرا سرار حالت میں برآمد ہونے کے بعد ضلعی انتظامیہ اورجموں وکشمیر پولیس نے تحقیقات شروع کی ہے۔
ذرائع نے بتایا کہ۱۳آرآر کے بریگیڈیر کو تحقیقات مکمل ہونے تک اٹیچ کیا گیا ہے۔
بتادیں کہ دفاعی ترجمان نے ہفتے کی شام کو ایکس پر جانکاری فراہم کرتے ہوئے بتایا ’’بفلیاز میں۲۱دسمبر کے واقعے کے بعد سیکورٹی فورسز کی طرف سے تلاشی آپریشن جاری ہے۔ ‘‘
ترجمان نے مزید بتایا کہ علاقے میں تین لوگوں کی موت کے متعلق اطلاعات موصول ہوئی ہیں۔
ترجمان کے مطابق:’’معاملہ زیر تحقیقات ہے، فوج تحقیقات میں بھر پور تعاون فراہم کرنے کیلئے پر عزم ہے۔‘‘
ادھر ذرائع کاکہنا ہے کہ علاقے میں تلاشی مہم کیلئے فوج کی مزید کمک بھیج دی گئی ہے۔