ممبئی// اسمرتی مندھانا کی نصف سنچری اننگز 74 رنز، جمائما روڈریگس 73 رنز، ریچا گھوش 52 رنز اور دیپتی شرما کی ناٹ آؤٹ 70 رنز کی بدولت ہندوستانی خواتین ٹیم نے واحد ٹیسٹ کے دوسرے دن وانکھیڑے اسٹیڈیم میں کھیلے جانے والے میچ میں پہلی اننگز کے اختتام تک سات وکٹوں پر 376 رنز بنا کر 157 رنز کی برتری حاصل کر لی۔
آج صبح ہندوستانی ٹیم نے اپنے کل کے اسکور ایک وکٹ پر 98 رنز سے آگے کھیلنا شروع کیا۔ اسمرتی مندھانا اور اسنیہ رانا نے ٹیم کو سنبھالا اور اسکور کو 140 رنز تک پہنچایا۔ اس دوران 36ویں اوور میں ایشلے گارڈنر نے اسنیہ رانا کو نو رنز پر آؤٹ کر کے ہندوستان کو دوسرا جھٹکا دیا۔ اس کے بعد اسمرتی مندھانا 39ویں اوور میں رن آؤٹ ہو گئیں۔ مندھانا نے 74 رنز کی شاندار نصف سنچری اننگز کھیلی۔
اس کے بعد جمائمہ روڈریگز اور ریچا گھوش نے اننگز کو سنبھالا اور چوتھی وکٹ کے لیے 113 رنز کی شراکت قائم کی۔ ہندوستان کی چوتھی وکٹ 52 رنز پر رچا کے ہاتھوں گری۔ کپتان ہرمن پریت کور شونے اور یاستیکا بھاٹیہ ایک ایک رن بنانے کے بعد آؤٹ ہوئیں۔ جمائمہ نے شاندار نصف سنچری اسکور کرتے ہوئے 73 رنز بنائے۔ وہ 79ویں اوور میں گارڈنر کے ہاتھوں کیچ آؤٹ ہوئی۔ دیپتی شرما اور پوجا وستراکر نے شاندار بلے بازی کی اور آٹھویں وکٹ کے لیے ریکارڈ 102 رنز کی ناٹ آؤٹ شراکت بنا کر ہندوستان کو مضبوط پوزیشن میں پہنچا دیا۔ دوسرے دن کا کھیل ختم ہونے پر ہندوستان نے سات وکٹوں پر 376 رنز بنائے اور اسے 157 رنز کی برتری حاصل ہے۔ دیپتی 70 اور پوجا 33 رنز بنا کر ناٹ آؤٹ ہیں۔
آسٹریلیا کی جانب سے ایشلے گارڈنر نے چار وکٹیں حاصل کیں۔ کم گارتھ اور جیس جوناسن نے 1-1 وکٹ حاصل کی۔
گزشتہ روز پہلے دن ٹاس جیت کر بیٹنگ کا فیصلہ کرنے کے بعد آسٹریلیا کی شروعات خراب رہی اور پہلے اوور کی چھٹی گیند پر اس کے اوپننگ بلے باز فوبی لیچ فیلڈ صفر پر رن آؤٹ ہو کر پویلین لوٹ گئے۔ اس کے بعد بیٹنگ کے لیے آنے والی ایلیس پیری اگلے ہی اوور میں چار رنز بنا کر وستراکر کا پہلا شکار بنیں۔ بیتھ مونی نے ٹالیا میک گرا کے ساتھ اننگز کو سنبھالا۔ 22 ویں اوور میں رانا نے میک گرا کو 50 رنز پر راجیشوری کے ہاتھوں کیچ آؤٹ کروا کر اس شراکت کو توڑا۔ اس کے بعد 29ویں اوور میں وستراکر نے بیتھ مونی کو 40 کے اسکور پر رانا کے ہاتھوں کیچ آؤٹ کرا دیا۔ 46ویں اوور میں کپتان الیسا ہیلی 38 رنز بنا کر دیپتی کے ہاتھوں بولڈ ہو گئیں۔ اینابیل سدرلینڈ نے 16، ایشلے گارڈنر نے 11، جیس جانسن نے 19، الانا کنگ نے پانچ، لارین چیٹل نے چھ رنز، کم گارتھ 28 رنز بنا کر ناٹ آؤٹ رہے۔
آسٹریلیا کی پوری ٹیم پہلی اننگز میں 77.4 اوورز میں 219 رنز پر آل آؤٹ ہوگئی۔