فائر اینڈ ایمرجنسی سروسز کے امیدواروں کا جموں میں احتجاج

جموں//
فائر اینڈ ایمرجنسی سروسز کے امیدواروں نے بدھ کے روز یہاں ایک بار پھر جمع ہوکر احتجاج درج کیا۔
احتجاجی جم کر نعرہ بازی کر رہے تھے اور محکمہ فائر اینڈ ایمرجنسی سروسز میں بھرتی عمل کے متعلق انکوائری رپورٹ سامنے لانے کا پر زور مطالبہ کر رہے تھے ۔
اس موقع پر ایک احتجاجی نے میڈیا کے ساتھ بات کرتے ہوئے کہا’’ہم پچھلے برس بھی یہاں احتجاج کر رہے تھے اور آج بھی یہاں احتجاج درج کرنے کیلئے مجبور ہوئے ہیں‘‘۔
مظاہرین نے کہا’’محکمہ فائر اینڈ ایمر جنسی سروسز کی بھرتی عمل کے متعلق ایک انکوائری کمیٹی تشکیل دی گئی تھی جس کو انکوائری رپورٹ سامنے لانی تھی لیکن ایسا نہیں کیا جا رہا ہے‘‘۔
ان کا کہنا تھا’’ہم متعلقہ حکام کے پاس جاتے ہیں تو وہ ہمیں انصاف دینے کا وعدہ تو کرتے ہیں لیکن انصاف نہیں مل رہا ہے ‘‘۔
احتجاجی نے کہا کہ ہم اپنا حق مانگتے ہیں جو ہمیں آئین نے دیا ہے ہم کوئی بھیک نہیں مانگتے ہیں۔انہوں نے کہا’’جب تک ہمیں انصاف نہیں ملے گا ہم سڑکوں پر احتجاج کرتے رہیں گے ۔‘‘