سرینگر//
ایڈیشنل ڈائریکٹر جنرل لا اینڈ آرڈر وجے کمار نے منگل کے روز پولیس کنٹرول روم میں کشمیر صوبے کی سیکورٹی صورتحال کا ایک اعلیٰ سطحی میٹنگ کے دوران جائزہ لیا۔
پولیس کے ایک ترجمان نے بتایا کہ کشمیر کی موجودہ صورتحال کا جائزہ لینے کی خاطر اے ڈی جی پی وجے کمار کی سربراہی میں منگل کے روز پولیس کنٹرول روم میں ایک اعلیٰ سطحی میٹنگ منعقد ہوئی جس میں پولیس اور سی آر پی ایف کے سینئر آفیسران نے شرکت کی۔
اے ڈی جی پی نے میٹنگ میں شریک سبھی آفیسران پر زوردیا کہ وہ زمینی سطح پر سیکورٹی گرڈ کی مضبوطی کو یقینی بنائے ۔
کمار نے شہر میں سی آر پی ایف اور جموں وکشمیر پولیس کے فیلڈ افسران کے درمیان مشترکہ پولیس کنٹرول روم کے قیام اور بہتر مواصلاتی طریقہ کار پر توجہ مرکوزکرنے کی ضرورت پر زور دیا۔
ایڈیشنل ڈائریکٹر جنرل آف پولیس وجے کمار نے ایس ایس پی سری نگر کو مشترکہ مورک ڈرل کرنے کی بھی ہدایت دی۔
اے ڈی جی پی نے میٹنگ میں موجود آفیسران سے مخاطب ہوتے ہوئے کہاکہ افواہیں پھیلانے والے شر پسندوں کی شناخت کرکے انہیں قانون کے کٹہرے میں کھڑا کیا جائے ۔
کمار نے مزید بتایا کہ امن و امان میں رخنہ ڈالنے والے افراد کے خلاف سخت کارروائی عمل میں لانا اب ناگزیر بن گیا ہے ۔انہوں نے موثر نگرانی کے ذریعے سے سی آئی گرڈ کو مضبوط بنانے اور پولیس تھانوں کے بنیادی کام کاج کو فعال کی ضرورت پر زور دیا۔
