مایاوتی کا ذات پر مبنی مردم شماری کا مطالبہ

نئی دہلی// بہوجن سماج پارٹی (بی ایس پی) کی صدر مایاوتی نے مرکزی حکومت سے ملک میں ذات پر مبنی مردم شماری کرانے کا مطالبہ کیا ہے ۔
محترمہ مایاوتی نے ہفتہ کو ایک ٹویٹ میں کہا کہ پارلیمنٹ کے آئندہ 4 دسمبر سے شروع ہونے والے سرمائی اجلاس سے قبل آج کل جماعتی میٹنگ میں بی ایس پی نے ایک بار پھر حکومت سے ملک میں ذات پات کی مردم شماری کرانے کا مطالبہ کیا۔ محترمہ مایاوتی نے کہا، ‘‘اب جب کہ ملک کے کونے کونے سے اس کا مطالبہ اٹھ رہا ہے ، اس سلسلے میں مرکزی حکومت کو بلاتاخیر مثبت قدم اٹھانا ضروری ہے ۔
انہوں نے کہا کہ مہنگائی، غربت، بے روزگاری، خراب سڑک، پانی، بجلی، تعلیم، صحت اور امن و امان سے پریشان اور ذات پات کے استحصال اور مظالم کا شکار ملک کے لوگوں میں ذات پات کی مردم شماری کے تئیں بے مثال دلچسپی اور بیداری ہے ، وہ بھارتیہ جنتا پارٹی (بی جے پی) کی نیند اڑائے ہوئے ہے اور کانگریس اپنے جرائم پر پردہ ڈالنے میں مصروف ہے ۔
بی ایس پی سربراہ نے کہا کہ اگرچہ مختلف ریاستی حکومتیں ‘سماجی انصاف’ کے نام پر بے دلی سے ذات پات کی مردم شماری کروا کر عوامی جذبات سے کافی حد تک فائدہ اٹھانے کی کوشش کر رہی ہیں، لیکن اس کا صحیح حل اسی وقت ممکن ہے جب مرکزی حکومت قومی سطح پر درست ذات پر مبنی مردم شماری کراکر لوگوں کو ان کا حق دینا یقینی بنائے گی۔