جموں وکشمیر میں امسال موسم خزاں کے دوران معمول سے زیادہ بارشیں ریکارڈ

سرینگر//
ماہرین موسمیات کے مطابق جموں وکشمیر میں گذشتہ برسوں کے مقابلے میں امسال ماہ نومبر کے دوران اب تک موسم بہتر رہا۔ان کا کہنا ہے کہ جموںکشمیر میں امسال موسم خزاں کے دوران بارشیں بھی معمول سے زیادہ ریکارڈ ہوئیں۔
وادی کے ماہر موسمیات ‘فیضان عارف کا کہنا ہے کہ سری نگر میں اب تک ماہ نومبر کے دوران زیادہ سے زیادہ درجہ حرارت اوسطاً۲ء۱۶ڈگری سینٹی گریڈ ریکارڈ کیا گیا جو معمول کے مطابق۰ء۱۶ڈگری سینٹی گریڈ ہونا چاہئے تھا۔
عارف نے کہا کہ اسی طرح سری نگر میں کم سے کم درجہ حرارت اوسطاً ۰ء۲ڈگری سینٹی گریڈ ریکارڈ کیا گیا جو معمول کے مطابق۰ء۱ڈگری سینٹی گریڈ ہونا چاہئے تھا۔ان کا کہنا تھا کہ امسال ماہ نومبر میں درجہ حرارت مجموعی طور پر معمول سے قدرے زیادہ ریکارڈ کیا جا رہا ہے بلکہ امسال گذشتہ برسوں کے مقابلے میں ماہ نومبر میں موسم بھی بہتر ہے ۔
ماہر موسمیات نت کہا کہ امسال موسم خزاں کے دوران بارشیں معمول سے زیادہ ریکارڈ کی گئیں۔انہوں نے کہا’’جموں وکشمیر میں امسال یکم اکتوبر سے۲۴نومبر تک۰ء۱۱۵ملی میٹر بارش ریکارڈ کی گئی جو معمول کے مطابق۵ء۵۹ملی میٹر ریکارڈ ہونی چاہئے تھی‘‘۔ان کا کہنا تھا کہ جموں وکشمیر میں امسال موسم خزاں کے دوران۹۳ فیصد زیادہ بارش ریکارڈ ہوئی ہے ۔
عارف نے کہا کہ موسم خزاں کے دوران سرینگر میں۲۷فیصد زیادہ بارش ریکارڈ ہوئی ہے جبکہ ضلع اننت ناگ اور گاندربل میں بالترتیب۵۵فیصد اور۴۱فیصد زیادہ بارش ریکارڈ ہوئی ہے ۔
ماہر موسمیات نے کہا کہ امسال دریائے جہلم میں پانی کی سطح میں بھی بہتری ہی ہوئی ہے ۔
قابل ذکر ہے کہ محکمہ موسمیات کے مطابق ماہ نومبر کے آخر تک وادی کشمیر میں موسم وسیع پیمانے پر خراب ہونے کا کوئی امکان نہیں ہے ۔