بیروہ قتل کیس کے الزام میں بھائی کو گرفتار کیا گیا: پولیس

سرینگر//
جموںکشمیر پولیس نے کا کہنا ہے کہ اس نے وسطی ضلع بڈگام کے قصبہ بیروہ میں بھائی کے قتل کے الزام میں ایک شخص کو گرفتار کرکے انتہائی کم وقت میں قتل کیس کو حل کرنے میں کامیابی حاصل کی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس کو۲۰نومبر۲۰۲۳کو ایک اطلاع موصول ہوئی کہ بیروہ کے سیل علاقے میں ایک۱۸یا۱۹سالہ نوجوان سمیر احمد راتھر کی لاش اس کے رہائشی مکان کے پیچھے دیکھی گئی۔
ترجمان نے کہا’’اطلاع پر فوری کارروائی کرتے ہوئے پولیس اسٹیشن بیروہ اور فارنسک سائنس لیبارٹری کی ٹیموں کی ایک ٹیم تشکیل دے کر تحقیقات شروع کی گئی‘‘۔
ان کا بیان میں کہنا تھا کہ کئی مشکوک افراد بشمول متوفی کے اہل خانہ کو پوچھ تاچھ کے لئے طلب کیا گیا۔بیان کے مطابق پوچھ تاچھ کے دوران سمیر احمد کے بھائی عاقب احمد راتھر نے اس جرم میں ملوث ہونے کا اعتراف کیا۔
بیان میں مزید کہا گیا’’عاقب نے دونوں کے درمیان۱۹؍اور۲۰نومبر کی درمیانی رات جھگڑا ہونے کا انکشاف کیا جس کے نتیجے میں سمیر کی موت واقع ہوئی‘‘۔
پولیس ترجمان نے کہا’’متوفی کے والد اور بہن نے بھی عتراف کرتے ہوئے اس قتل میں عاقب کے رول کے بارے میں تفصیلات فراہم کیں‘‘۔
ترجمان نے کہا’’عاقب کو گرفتار کیا گیا اور اس سلسلے میں مکمل تحقیقات شروع کی گئی جس کے نتیجے میں ضروری شواہد اور سمیر پر حملہ کرنے کے لئے عاقب کی طرف سے استعمال کیا جانے والا ہتھیار بھی بر آمد کیا گیا‘‘۔
ان کا مزید کہنا تھا کہ اس سلسلے میں آئی پی سی کی دفعہ۳۰۲کے تحت ایک کیس درج کیا گیا۔