اَٹل ڈولو ممکنہ طور پر جموںکشمیرکے اگلے چیف سیکریٹری ہوں گے

سرینگر//
مرکزی سرکار نے جموں کشمیر کیڈر کے سینئر انڈین ایڈمنسٹریٹو سروس افسر‘ اَٹل ڈولو کو جموں کشمیر میں واپس تعینات کیا ہے اور وہ یونین ٹریٹری کے اگلے چیف سیکرٹری ہوسکتے ہیں۔
ڈولو ۱۹۸۹ بیچ کے آئی اے ایس افسر ہیں اور مرکزی سرکار نے ان کو گزشتہ برس باڈر منیجمنٹ سیکریٹری کے عہدے پر مرکز میں تعینات کیا تھا، تاہم مزکری وزارت داخلہ نے آج ایک حکمنامہ جاری کرتے ہوئے کہا کہ مرکزی کابینہ کی تقرری کمیٹی نے اَٹل ڈولو کی جموں کشمیر میں واپس تعیناتی کو منظوری دی ہے۔
ڈولو یونین ٹریٹری میں سینئر ترین آئی اے ایس افسر ہیں، جس کے باعث وہ جموں کشمیر کے اگلے چیف سیکرٹری بن سکتے ہیں۔ڈولو وادی کشمیر کے ضلع کولگام کے کلم گاؤں سے تعلق رکھتے ہیں،تاہم ان کے والد سنہ۱۹۶۰میں سرینگر منتقل ہوگئے تھے اور وہ تب سے شہر میں ہی رہائش پذیر ہوئے تھے، بعد ازاں وہ دہلی چلے گئے تھے۔
مرکز میں تعیناتی سے قبل اَٹل ڈولو محکمہ صحت و میڈیکل ایجوکیشن کے فائنانشل کمشنر تعینات تھے اور آخری محکمہ زراعت کے ایڈیشنل چیف سیکرٹری رہے۔
جموںکشمیر میں اس وقت آئی اے ایس افسر ڈاکٹر ارون کمار مہتا چیف سیکرٹری کے عہدے پر فائز ہیں۔ وہ رواں ماہ کی۳۰تاریخ کو ملازمت سے سبکدوش ہورہے ہیں۔
کمار مہتا کو دو سال قبل بی وی آر سبھرانیم کی جگہ پر چیف سیکرٹری جموں و کشمیر تعینات کیا گیا تھا۔ مہتا نے بطور چیف سیکرٹری کئی متنازعہ بیانات دئے اور سرکاری ملازمین پر الزام عائد کیا کہ ان میں سے ڈھائی لاکھ ملازمین غیر قانونی طور یا بیک ڈور طریقے سے سرکاری نوکری حاصل کر چکے ہیں۔