کینیڈا کو ویانا کنونشن کا احترام کرنا چاہئے :باگچی

نئی دہلی//
۱۲نومبر کو کینیڈا کے وینکوور میں ہندوستانی قونصل خانے کے قونصلر کیمپ پر ہوئے حملوں پر تشویش کا اظہار کرتے ہوئے ہندوستان نے کینیڈا کی حکومت کو ویانا کنونشن کے احترام کو یقینی بنانے کا مشورہ دیا ہے ۔
آج یہاں ایک باقاعدہ بریفنگ میں کینیڈا میں ہونے والے واقعات کے بارے میں سوالات کا جواب دیتے ہوئے وزارت خارجہ کے ترجمان ارندم باگچی نے کہا’’کینیڈا میں ہمارے ہائی کمیشن اور قونصل خانے باقاعدگی سے قونصلر کیمپوں کا اہتمام کرتے ہیں۔ ایسا ہی ایک کیمپ وینکوور کے قریب۱۲نومبر کو پنشنرز کو لائف سرٹیفکیٹ فراہم کرنے کے لیے لگایا گیا تھا۔ کچھ بنیاد پرست عناصر کی جانب سے پریشانی پیدا کرنے کی کوششوں کے باوجود یہ تقریب کامیابی سے منعقد ہوئی۔ خوش قسمتی سے اس وقت ہمارے قونصل جنرل موجود نہیں تھے ۔ ہم اقوام کے لیے سفارتی تعلقات کے ویانا کنونشن کا احترام کرنے کی ضرورت کا اعادہ کرتے ہیں تاکہ ہمارے سفارت کار اپنی سفارتی ذمہ داریوں کو احسن طریقے سے ادا کر سکیں‘‘۔
باگچی نے کہا’’جہاں تک دیوالی میں برامپٹن یا مسی ساگا کے قریب پیش آنے والے واقعات کا تعلق ہے ۔ میرے خیال میں یہ دونوں گروہوں کے درمیان بدامنی کی نوعیت تھی۔ سچ پوچھیں تو مجھے نہیں لگتا کہ ہمارے قونصلیٹ کو کوئی شکایت موصول ہوئی ہے ۔ میں نے کچھ سوشل میڈیا رپورٹس دیکھی ہیں۔ ’’ہم یہ بھی سمجھتے ہیں کہ وہاں کے حکام واقعے کی تحقیقات کر رہے ہیں، اس لیے مزید کچھ کہنا نہیں ہے ۔‘‘