بٹہ مالو میں آتشزدگی کی واردات

سرینگر//
جموںکشمیر کی گرمائی راجدھانی سر ینگر کے بٹہ مالو علاقے میں شبانہ آگ کی واردات میں چھ دکانیں اور ایک خالی ہوٹل کو نقصان پہنچا ہے ۔
فائر اینڈ ایمرجنسی محکمہ کے ایک عہدیدار نے یو این آئی اردو کو بتایا کہ درمیانی شب بٹہ مالو میں واقع ایک کمرشل عمارت سے آگ نمودار ہوئی۔
عہدیدارنے بتایا کہ فائر اینڈ ایمرجنسی عملے کے اہلکار فوری طورپر جائے موقع پر پہنچے اور آگ بجھانے کی کارروائی شروع کی۔
ان کے مطابق انتھک کوشش کے بعد آگ پر قابو پایا گیا تاہم آتشزدگی کی اس واردات میں کمرشل عمارت جس میں چھ دکانیں اور ایک خالی ہوٹل شامل ہیں کو جزوی نقصان پہنچا ہے ۔
مذکورہ عہدیدار نے مزید بتایا کہ بارہ فائر ٹینڈروں کی مدد سے آگ پر قابو پایا گیا ۔
دریں اثنا پولیس نے آگ لگنے کی وجوہات جاننے کی خاطر کیس درج کرکے تحقیقات شروع کی ہے ۔