صاحب یہ جمہوریت بھی بڑی کمال کی چیز ہے… جو مجھ جیسے ناچیز کی سمجھ میں نہیں آرہی ہے… بالکل بھی نہیں آ رہی ہے… اس لئے نہیں آ رہی ہے ہم… ہم یہ ماننے کیلئے تیار نہیں ہیں… بالکل بھی نہیں ہیں کہ جمہوریت کا مطلب الیکشن اور الیکشن کے ذریعے کسی بھی سیاسی پارٹی کو اقتدار میں لانا یا اسے اقتدار سے بے دخل کرنا ہے… جمہوریت اور اس کی تشریح اتنی محدود نہیں ہو سکتی ہے… اس کے معنی اور مفہوم کچھ اور بھی ہو سکتے ہیں اور… اور اللہ میاں کی قسم ہیں بھی ۔اپنے بھارت دیش میں ایسے لوگوں…لوگوں نہیں‘ سیاستدانوں… سیاستدانوں نہیں بلکہ مجرموں نے جمہوریت کے جو معنی سمجھ لئے ہیں یا اخذ کئے ہیں… وہ کسی بھی جمہوری نظام… کسی بھی ملک کے جمہوری نظام پر بڑا سوالیہ لگا سکتے ہیں اور… اور لگا رہے ہیں۔یہ ایسے مجرم ہیں جو اسی جمہوریت اور اس نظام کی آڑ میں ایسے کام کرتے ہیں… کہ جنہیں دیکھ کر بے چارہ شیطان بھی پانی پانی ہو جائے … ایسے مجرم اور مجرمانہ ذہنیت کے لوگ ہمیں لوک سبھا میں بھی ملتے ہیں‘ اسمبلیوں میں بھی ‘پنچایتی اداروں اور بلدیاتی اداروں میں بھی … اور ملتے رہیں گے … کیونکہ یہ پیسوں اور اثر و رسوخ کے دم خم پر کچھ بھی حاصل کر نے کی استطاعت رکھتے ہیں… ہمارا ملک‘ جو دنیا کا سب سے بڑا جمہوری ملک ہے… اس مسئلہ ‘ اس اشو پر … مجرموں کے عوامی نمائندگان بننے پر روک نہیں لگا سکا … مجرموں کو جمہوری اداروں سے دور رکھنے میں زیادہ تر کامیاب نہیں ہو رہاہے… کیوں نہیں ہو رہا ہے… یہ الگ بحث ہے… خبریہ ہے کہ کشمیر میں سرینگر میونسپلٹی کے ایک کارپوریٹر پر پبلک سیفٹی ایکٹ عائد کرکے اسے کورٹ بلوال جموں منتقل کیا گیا ہے… کارپوریٹر پر بڑے سنگین الزامات عائد کئے گئے ہیں… جن میں خواتین کو جنسی طور ہراساں کرنے کا الزام بھی شامل ہے … کہتے ہیں کہ چور وہی جو پکڑا جائے … یہ کارپوریٹر صاحب پکڑے گئے‘ لیکن… لیکن اس کا مطلب یہ نہیں ہے اور… اور بالکل بھی نہیں ہے…کہ… کہ ہمارے دوسرے سبھی کارپوریٹر صاحباں‘ کونسلر صاحبان‘ پنچ اور سرپنچ صاحبان اور دوسرے جمہوری اداروں سے منسلک حضرات دودھ کے دُھلے ہیں… نہیں صاحب ایسا نہیں ہے… یہاں تو سرپنچ کو دو ہزار روپے کی رشوت لیتے ہوئے بھی پکڑا گیا…یہاں تو میئر اور ڈپٹی میئروں پر بھی ایسے ایسے الزامات عائد کئے جاتے رہے ہیں کہ… کہ عقل دھنگ رہ جاتی ہے… لیکن کیا کیجئے گا کہ… کہ یہ جمہوریت کا ایسا پہلو ہے… جس نے سارے جمہوری نظام کو داغدار کیا ہے اور… اور سو فیصد کیا ہے ۔ہے نا؟
