پی ایچ ای کے عارضی ملازمین کا سری نگر میں احتجاج

سرینگر//
محکمہ پبلک ہیلتھ انجینئرنگ (پی ایچ ای) کے عارضی ملازمین نے منگل کو یہاں اپنے مطالبات خاص طور پر تنخواہوں کی واگذاری کو لے کر احتجاج درج کیا۔
احتجاجی ملازمین نے ہاتھوں میں بینرس اٹھا رکھے تھے اور وہ جم کر نعرہ بازی کر رہے تھے۔
اس موقع پر پی ایچ ای ڈیلی ویجرس فورم کے صدر سجاد احمد پرے نے میڈیا کے ساتھ بات کرتے ہوئے کہا کہ سرکار نے ہماری تنخواہوں کو روک رکھا ہے جس کی وجہ سے ہم سڑکوں پر آنے کے لئے مجبور ہوگئے۔
احمد نے کہا’’ہمیں سڑکوں پر آنے کا کوئی شوق نہیں ہے لیکن سرکار ہمیں ایسا کرنے پر مجبور کرتی ہے‘‘۔
فورم کے صدر نے کہا کہ سرکار سے ہمارا مطالبہ ہے کہ ہماری تنخواہوں کو واگذار کرے اور جو وعدہ وزیر اعظم نریندر مودی اور وزیر داخلہ امیت شاہ نے پارلیمنٹ میں کیا ہے اس کو عملی جامہ پہنائے۔
احمد نے کہا کہ اگر ایسا نہیں کیا گیا تو ہمارے پاس سڑکوں پر آنے کے سوا دوسرا کوئی چارہ نہیں ہے۔ان کا کہنا تھا کہ ۲۰۱۸میں ساتواں تنخواہ کمیشن لاگو کیا گیا اس حساب سے ایک عارضی ملازم کی ماہانہ تنخواہ ۱۸ ہزار سے۲۶ ہزار ہونی چاہئے لیکن ان کے تنخواہوں میں بہت کم اضافہ کیا گیا۔
فورم کے صدرنے کہا کہ عارضی ملازمیں تمام محکموں میں بہتر طریقے سے اپنی خدمات انجام دیتے ہیں لیکن ان کی تنخواہوں میں معمولی اضافہ کیا جاتا ہے۔انہوں نے کہا کہ ہمارا مطالبہ یہ بھی ہے کہ سرکار منیمم ویجز ایکٹ کو بھی لاگو کرے۔
بتادیں کہ پی ایچ ای میں تعینات ڈیلی ویجر اور کیجول ملازمین پچھلے دو ماہ سے اجرتوں سے محروم ہے۔