پلوامہ میں لشکر کے دو دہشت گرد معاونین گرفتار

سرینگر//
پولیس نے جمعہ کو پلوامہ کے گڈورہ علاقے میں دہشت گرد تنظیم‘لشکر طیبہ سے وابستہ ۲دہشت گرد ساتھیوں کو مجرمانہ مواد کے ساتھ گرفتار کیا۔
پولیس ترجمان نے ایک بیان میں کہا کہ مخصوص انٹیلی جنس اطلاعات پر کارروائی کرتے ہوئے، پلوامہ پولیس کی طرف سے گڈورہ پلوامہ کے سیب کے باغات میں تلاشی لی گئی جس کے نتیجے میں ۲دہشت گرد ساتھیوں کو گرفتار کیا گیا۔
گرفتار دہشت گردوں کے ساتھیوں کی شناخت سہیل فردوس ولد فردوس احمد شیخ ساکنہ مہرڑ پورہ اتر پورہ پوچل اور شاہد گل ولد غلام محمد بھٹ ساکنہ واگم پلوامہ کے طور پر ہوئی ہے۔
پولیس ترجمان نے ایک بیان میں کہا کہ تفتیش سے یہ بات سامنے آئی ہے کہ دونوں ملزمان ایک سرگرم دہشت گرد عاقب شیر گوجری کے دہشت گرد ساتھی ہیں جس کا تعلق کالعدم دہشت گرد تنظیم لشکر طیبہ سے ہے۔
ترجمان نے مزید کہا کہ ابتدائی تفتیش سے یہ بھی پتہ چلتا ہے کہ گرفتار دہشت گرد ساتھی دہشت گرد عاقب شیر گوجری کے ساتھ مل کر پلوامہ میں دہشت گردانہ حملے کرنے کی سازش میں تھے۔
اس دوران وسطی ضلع بڈگام کے پکھر پورہ علاقے میں سیکورٹی فورسز نے ہابرڈ ملی ٹینٹ اور اس کے ساتھی کو قابل اعتراض مواد سمیت حراست میں لینے کا دعویٰ کیا ہے ۔
پولیس کے ایک ترجمان نے بتایا کہ بڈگام پولیس اور۵۳آر آر نے ہابرڈ ملی ٹینٹ اور اس کے ساتھی کو دھر دبوچ کر سلاخوں کے پیچھے دھکیل دیا۔
ترجمان نے ہابرڈ ملی ٹینٹ کی پہچان تنویر احمد بٹ ولد غلام محمد بٹ ساکن کار پورہ چرار شریف اور ملی ٹینٹ معاون کی شناخت یاور مقبول گنائی ولد مقبول گنائی ساکن کار پورہ چرار شریف کے بطور کی ہے ۔
پولیس ترجمان کے مطابق ابتدائی تحقیقات کے دوران منکشف ہوا کہ دونوں پکھر پورہ علاقے میں لشکر طیبہ اور ٹی آر ایف کے لئے کام کر رہے تھے ۔انہوں نے بتایاکہ گرفتار شدگان کے قبضے سے ایک پستول ، نو پستول گولیوں کے راونڈ اور دوسرا قابل اعتراض مواد برآمد کرکے ضبط کیا گیا۔
پولیس نے اس سلسلے میں چرار شریف پولیس اسٹیشن میں کیس درج کرکے مزید تحقیقات شروع کی۔