جموں:ریاسی جھڑپ میں ایک دہشت گردہلاک‘پولیس اہلکار زخمی

جموں/ستمبر
جموں وکشمیر کے ریاسی ضلع کے چسانہ گاوں میں سیکورٹی فورسز کے ساتھ مسلح تصادم میں اب تک ایک عدم شناخت دہشت گرد مارا گیا جبکہ ابتدائی فائرنگ میں پولیس اہلکار زخمی ہوا جس کو علاج ومعالجہ کی خاطر نزدیکی ہسپتال منتقل کیا گیا۔
اطلاعات کے مطابق ریاسی کے چسانہ گاوں میں دہشت گردوں کے چھپے ہونے کی ایک خاص اطلاع موصول ہونے کے بعد سیکورٹی فورسز نے پیر کی سہ پہر جوں ہی علاقے کو محاصرے میں لے کر تلاشی آپریشن شروع کیا تو اسی اثنا میں وہاں پر موجود دہشت گردوں نے فورسز پر اندھادھند فائرنگ شروع کی۔انہوں نے بتایا کہ سیکورٹی فورسز نے بھی پوزیشن سنبھال کر جوابی کارروائی کا آغاز کیا جس دوران دو بدو گولیوں کا تبادلہ شروع ہوا۔
معلوم ہوا ہے کہ دہشت گردوں کی ابتدائی فائرنگ میں ایک پولیس اہلکار زخمی ہوا ہے جس کو علاج ومعالجہ کی خاطر نزدیکی ہسپتال منتقل کیا گیا۔پولیس ذرائع نے بتایا کہ گاوں میں دو دہشت گرد چھپے ہوئے ہیں۔
دریں اثنا ایڈیشنل ڈائریکٹر جنرل آف پولیس جموں رینج مکیش سنگھ نے بتایا کہ ریاسی کے چسانہ گاوں میں سیکورٹی فورسز اور دہشت گردوں کے مابین تصادم جاری ہے ۔انہوں نے کہاکہ سیکورٹی فورسز کی جوابی کارروائی میں ایک عدم شناخت دہشت گرد مارا گیا جس کی شناخت اور تنظیمی وابستگی کے بارے میں جانچ پڑتال شروع کی گئی ہے ۔
آخری اطلاعات موصول ہونے تک علاقے میں آپریشن جاری تھا۔اس سلسلے میں مزید تفصیلات کا انتظار ہے ۔