غیر ملکی دورے سے واپسی پر مودی آج اسرو کے دفتر جائیں گے

نئی دہلی//
وزیر اعظم‘ نریندر مودی کے جنوبی افریقہ اور یونان کے اپنے دورے سے واپس آنے کے فوراً بعد ہفتہ کی صبح بنگلورو میں واقع ہندوستانی خلائی تحقیقی تنظیم (اسرو) کے سیٹلائٹ لانچ اینڈ مانیٹرنگ سینٹر (اسرو ٹیلی میٹری ٹریکنگ اینڈ کمانڈ نیٹ ورک) کا دورہ کریں گے ۔
جمعہ کی رات وزیر اعظم کے دفتر سے جاری ایک ریلیز کے مطابق مسٹر مودی صبح تقریباً۱۵:۷بجے اسرو کے کمانڈ سینٹر پہنچیں گے ۔
مودی وہاں چندریان۳مشن سے وابستہ اسرو کے سائنسدانوں سے ملاقات اور بات چیت کریں گے ۔ وہاں وزیر اعظم کو چندریان۳مشن کی اب تک کی سرگرمیوں اور نتائج کے بارے میں معلومات دی جائے گی۔
خیال رہے کہ چندریان۳مشن کے ذریعے اسرو نے۲۳؍اگست کو شام۶بجکر ۴منٹ پر لینڈر وکرم کو چاند کے جنوبی قطب کے محفوظ علاقے میں کامیابی کے ساتھ اتارا۔
مودی نے جوہانسبرگ سے اس تاریخی لمحے کا براہ راست ٹیلی کاسٹ دیکھا تھا اور ویڈیو کانفرنسنگ ٹیم سے بھی خطاب کیا تھا۔