نئی دہلی//
وزیر اعظم نریندر مودی نے آج دہلی کے لال قلعہ پر پرچم لہرایا، ہندوستان کے سامنے بڑے مواقع کی بات کی، اور سیاسی حریفوں کو آڑے ہاتھوں لیا۔ آخر میں انہوں نے کہا کہ اگر عوام کا آشیرواد ساتھ رہا تو وہ اگلے سال واپس آئیں گے۔
وزیر اعظم نے اپنی تقریر میں کہا’’تبدیلی کا وعدہ مجھے یہاں لے آیا، میری کارکردگی مجھے ایک بار پھر یہاں لے آئی۔ آنے والے پانچ سال بے مثال ترقی کے ہیں اور ۲۰۴۷ تک ہندوستان کے ایک ترقی یافتہ ملک کے خواب کو شرمندہ تعبیر کرنے کا ایک سنہری لمحہ ہے‘‘۔
مودی نے ۲۰۲۴ کے لوک سبھا انتخابات سے پہلے اپنے آخری یوم آزادی کے خطاب میں کہا ’’اگلے سال، اسی لال قلعے سے ۱۵؍اگست کو میں قوم کی طرف سے حاصل کی گئی ترقی کی فہرست دوں گا اور آپ کی طاقت، آپ کے عزم اور آپ کی کامیابی کیلئے زیادہ اعتماد کے ساتھ گانا گاؤں گا۔‘‘
عام انتخابات اگلے سال اپریل سے مئی میں ہوں گے۔
مودی نے کہا کہ انہوں نے۲۰۱۴میں تبدیلی لانے کا قوم سے وعدہ کیا تھا۔
وزیر اعظم نے کہا’’آپ نے مجھ پر اپنا اعتماد ظاہر کیا۔ میں نے آپ کے مجھ پر کیے گئے اعتماد کو پورا کرنے کی کوشش کی۔ میں نے جو وعدے کیے ہیں ان سے مجھے پچھلے پانچ سالوں میں اعتماد حاصل ہوا ہے۔ میں نے آپ سے اصلاحات، کارکردگی اور تبدیلی کے ذریعے تبدیلی لانے کا وعدہ کیا تھا۔ میں نے اس کیلئے سخت محنت کی ہے۔ قوم اور میں نے فخر کے ساتھ کام کیا ہے۔‘‘