نئی دہلی// راجدھانی دہلی میں حکمراں عام آدمی پارٹی (اے اے پی) کے کئی بانی ارکان اور سابق عہدیداروں نے آج مہاراشٹر کے وزیر اعلی ایکناتھ شندڈے کی قیادت والی شیو سینا میں شمولیت اختیار کر لی۔
شیو سینا میں شامل ہونے والوں میں بوانا سے سابق ایم ایل اے امیدوار اور اے اے پی کے بانی رکن ایڈوکیٹ منوج دھریان اور کوآرڈینیٹر اور پبلک گریونس مانیٹرنگ سسٹم (پی جی ایم ایس سیل) کے مشیر ادھم سنگھ اور اے اے پی کے سابق ضلع سکریٹری اور پی جی ایم ایس سیل کے سابق رکن یشپال شامل ہیں۔
ان تمام لوگوں نے شیوسینا کے ممتاز لیڈر آنندراؤ اڈسول، دہلی اور گوا کے چیف کوآرڈینیٹر انشومن جوشی اور دہلی کے انچارج کرنل دیویندر سہراوت کی موجودگی میں شیوسینا کی رکنیت حاصل کی۔
دہلی کے عوام کی فلاح و بہبود اور جامع ترقی کو ترجیح دینے پر شیو سینا کی قیادت کا شکریہ ادا کرتے ہوئے عام آدمی پارٹی کے سابق قائدین نے اجتماعی طور پر حکمراں پارٹی کی جانب سے تقرریوں، عطیات اور دیگر مبینہ بے ضابطگیوں کے سلسلے میں بڑے پیمانے پر بدعنوانی اور غلط کاموں کو بے نقاب کرنے کو کہا۔
اس موقع پر بات کرتے ہوئے مسٹر اڈسل نے کہاکہ "دہلی کے تجربہ کار رہنما اب ہماری پارٹی میں شامل ہو رہے ہیں اور یہ سیاسی منظر نامے کا ایک اہم لمحہ ہے ۔ وہ ان حکمت عملیوں کے بارے میں بصیرت فراہم کریں گے جو ہمارے آگے کے راستے کو تشکیل دیں گی۔”
مسٹر جوشی نے کہا کہ شیو سینا بدعنوانی کے خلاف لڑے گی اور حکمراں پارٹی کے تمام غلط کاموں کو بے نقاب کرے گی۔ ستمبر کے آخر تک پارٹی جلد ہی تمام اسمبلی حلقوں میں پہنچ کر عوام کے اہم مسائل کی نشاندہی کرے گی۔ جو لوگ پہلے اور آج شیوسینا میں شامل ہوئے ہیں وہ صلاحیت اور اثر و رسوخ کے حامل لیڈر ہیں۔ ان کی فعال شرکت اور نچلی سطح کے تجربات سے ہم دہلی کے لیے صحیح حکمت عملی تیار کرنے میں کامیاب ہوں گے ۔