متعدد جرائم میں ملوث ہونے پر دو؍افراد کیخلاف چارج شیٹ دائرـ

سرینگر//
کرائم برانچ کشمیر (سی بی کے ) کی اقتصادی جرائم ونگ نے مبینہ طور متعدد جرائم میں ملوث ہونے کے الزام میں دو افراد کے خلاف چارج شیٹ دائر کی ہے ۔
سی بی کے کے ایک ترجمان نے اپنے ایک بیان میں کہا کہ اقتصادی جرائم ونگ سری نگر (کرائم برانچ کشمیر) نے آر پی سی کے دفعات۴۱۹/۴۶۸/۴۷۱/۱۲۰بی ؍اور ۲۰۱کے تحت قابل سزا جرائم میں مبینہ طور پر ملوث ایف آئی آر زیر نمبر۲۰۱۶/۶۰میں دو افراد کے خلاف چارج شیٹ دائر کی ہے ۔
ترجمان نے کہا’’کرائم برانچ کشمیر (اب اقتصادی جرائم ونگ سری نگر) کو تحصیلدار(سائوتھ) سرینگر سے ایک مواصلت موصول ہوئی جس میں انکشاف کیا گیا تھا کہ ان ملزموں نے بے ایمانی اور دھوکہ دہی سے بینک قرضہ حاصل کرنے کے لئے جعلی محصولات تیار کرکے ان کو جموں و کشمیر بینک کے ہری سنگھ ہائی اسٹریٹ برانچ میں جمع کیا‘‘۔
بیان میں کہا گیا کہ بینک حکام نے ان جعلی محصولات کو شکایت کنندہ (تحصیلدار سائوتھ) کو تصدیق کیلئے بھیج دیا تھا جو ویری فکیشن کے بعد جعلی پائے گئے ۔انہوں نے کہا کہ اس کے بعد پولیس اسٹیشن کرائم برانچ کشمیر میں ۲۰۱۶میں ایک کیس درج کرکے تحقیقات شروع کی گئیں۔
بیان کے مطابق تحقیقات کے دوران عائد شدہ الزامات کو سچ ثابت کیا گیا اس طرح ملزمان کے خلاف عدالتی فیصلے کے لئے چارج شیٹ دائر کی گئی۔