کیا الیکشن ہونے والے ہیں؟جموں کشمیرمیں اسمبلی الیکشن ہونے والے ہیں؟نہیں صاحب! یہ ہم بھی جانتے ہیں کہ جموں کشمیر میں اسمبلی الیکشن ہونے میں ابھی صدیاں لگ جائیں گی اور… اور فی الحال یو ٹی میں الیکشن… اسمبلی الیکشن کیلئے ’مناسب وقت‘ بھی نہیں ہے… پھر پی ڈی پی اور نیشنل کانفرنس لڑ کیوں رہی ہیں… یا انہوں نے لڑنا شروع کیوں کردیا ہے ۔ وہ کیا ہے کہ ہم جانتے ہیں کہ دونوں کا گپکار الائنس کے ذریعے اتحاد دکھاوا ہے‘ کاغذی ہے ‘ اس میں چھل ہے ‘ کپٹ ہے‘ دھوکہ ہے‘ مکر ہے‘ فریب ہے… ایک دوسرے کو پچھاڑنے کی نیت بھی ہے… ایک دوسرے کے وجود کو مٹانے کی سازش بھی ہے‘ایک دوسرے کو شکست دے کر اقتدار پر براجمان ہونے کا خواب بھی ہے… یہ سب ٹھیک ہے‘ ہمیں اس سب پر کوئی اعتراض نہیں ہے… لیکن پہلے الیکشن کا اعلان ہونے تو دیجئے کہ… کہ ابھی الیکشن کا اعلان تو دور کی بات ہے … دہلی میں اور بھی بڑے کام کرنے کو ہیں… اور یہ بات این سی اور پی ڈی پی کی سمجھ میں جتنی جلدی آئے اتنا ہی ان کیلئے ٹھیک ہے… یہ دونوں جماعتیں جو کرنے لگی ہیں… اس کا اندازہ تو ہمیں پہلے سے ہی تھا… ہم جانتے تھے کہ وقت آنے پر یہ ایک دوسرے کو کھا جائیں گی …ایک دوسرے سے لڑ پڑیں گی… لیکن… لیکن ابھی وہ وقت نہیں آیا ہے … اُس وقت کے آنے میں ابھی بہت سارا وقت ہے… ڈھیر سارا وقت …اچھا ہو گا کہ… کہ تب تک دونوں جماعتیں اور ان کے ترجمان حضرات صبر سے کام لیں… ایک دوسرے کیخلاف سب کچھ بچا کے رکھیں اور… اور جب کبھی جموںکشمیر میں الیکشن… اسمبلی الیکشن کا اعلان ہو گا تو… تو دونوں اپنی اپنی تلواریںمیان سے باہر نکالیں اور ایک دوسرے پر وار کریں… لیکن جب تک وہ وقت نہیں آتا ہے… تب تک دونوں صبر سے کام لیں کہ… کہ قوم کو حیرانی ہو گی او ر نہ پریشانی… یہ قوم اچھی طرح جانتی ہے کہ این سی کیا ہے اور… اور پی ڈی پی کیا ہے…قوم دونوں کے ماضی سے بخوبی واقف ہے…قوم جانتی ہے کہ ان دونوں جماعتوں نے وقت وقت پر کیا کیا اورکیا نہیں کیا… دونوں لڑیں نا‘ ایک دوسرے کے کپڑے تک پھاڑ ڈالے نا…لیکن پہلے الیکشن… اسمبلی الیکشن کا اعلان تو ہونے دیں… ایک بار اعلان ہونے دیں‘ پھر ان پر ساری بندشیں … ساری پابندیاں ختم ہو جائیں گی… لیکن تب تک یہ جنگ بندی کریں اور… اور ہاں زبان بندی بھی ۔ ہے نا؟