جموں:ارینا سیکٹر میں دراندازی کی کوشش ناکام، درانداز مارا گیا

جموں//
بارڈر سیکورٹی فورس(بی ایس ایف) کے اہلکاروں نے جموں ضلع کے ارینا سیکٹر میں بین الاقوامی سرحد پر دراندازی کی ایک کوشش کو ناکام بنا کر درانداز کو گولی مار کر ہلاک کردیا ۔
بی ایس ایف کے ایک ترجمان نے بتایا کہ ارینا سیکٹر میں بین الاقوامی سرحد پر جبوال بارڈر آوٹ پوسٹ کے نزدیک اتوار اور پیر کی درمیانی شب بی ایس ایف اہلکاروں نے ایک مشکوک نقل و حمل دیکھی۔
ترجمان نے کہا ’’ جب مشتبہ درانداز نے مسلسل وارننگز کی طرف توجہ نہیں دی تو بی ایس ایف جوانوں نے گولی چلائی جس کے نتیجے میں ایک درانداز کی برسر موقع ہی موت واقع ہوگئی جس کے بعد علاقے میں تلاشی آپریشن شروع کردیا گیا‘‘۔
ترجمان نے بتایا کہ جاں بحق درانداز کی لاش برآمد کرکے اس کی شناخت کے لئے کارروائی شروع کی گئی ہے ۔انہوں نے کہا کہ علاقے میں تلاشی آپریشن ہنوز جاری ہے ۔
اس دوران جموں کشمیر کے پونچھ ضلع کے مینڈھر میں ایل او سی پر بارودی سرنگ کو ناکارہ بنایا گیا۔
اطلاعات کے مطابق مینڈھر پونچھ میں ایل او سی پر پیر کے روز ایک بارودی سرنگ کا پتہ چلا جس کے بعد بم ڈسپوزل اسکارڈکو طلب کیا گیا۔
معلوم ہوا ہے کہ بعد ازاں بی ڈی ایس اسکارڈ نے بارودی سرنگ کو ناکارہ بنا یا۔