جموں و کشمیر میں کوٹہ، انتخابی ریزرویشن پر چار بل پیش ہوں گے

سرینگر//
مرکزی حکومت جموں و کشمیر میں کوٹہ اور انتخابی ریزرویشن سے متعلق چار اہم بل بدھ کو پارلیمنٹ میں پیش کرے گی۔
لوک سبھا کی نظرثانی شدہ فہرست کے مطابق مرکزی وزیر داخلہ امیت شاہ جموں و کشمیر تنظیم نو قانون۲۰۱۹میں ترمیم کے لیے ایک بل پیش کریں گے۔
اس بل کا مقصد جموں و کشمیر اسمبلی میں تین نشستیں ‘دو کشمیری پنڈتوں کے لیے اور ایک پاکستانی مقبوضہ جموں و کشمیر کے پناہ گزینوں کے لیے مخصوص کرنا ہے۔
مرکزی وزیر داخلہ جموں و کشمیر ریزرویشن ایکٹ ۲۰۰۴ میں ترمیم کا بل بھی پیش کریں گے۔
جموں و کشمیر ریزرویشن ایکٹ‘۲۰۰۴ریاستی قانون ہے۔ پارلیمنٹ میں اس میں ترمیم کی جا رہی ہے کہ ’دیگر سماجی ذاتوں‘ کو ’دیگر پسماندہ طبقات‘ کا نام دیا جائے۔
شیڈول کے مطابق، مرکزی قبائلی امور کے وزیر‘ ارجن منڈا آئین (جموں و کشمیر) شیڈول ٹرائب آرڈر‘۱۹۸۹ میں مزید ترمیم کے لیے ایک بل پیش کریں گے۔
آئین (جموں و کشمیر) شیڈول ٹرائب آرڈر (ترمیمی) بل‘۲۰۲۳ پہاڑیوں، پڈریوں، گڈا برمن اور کولی قبائل کو شامل کرنے کی کوشش کرتا ہے۔
مرکزی وزیر برائے سماجی انصاف ڈاکٹر وریندر کمار آئین (جموں و کشمیر) شیڈول کاسٹس آرڈر (ترمیمی) بل‘ ۲۰۲۳پیش کریں گے‘جس میں والمیکی برادری کو جموںکشمیر کی درج فہرست ذاتوں کی فہرست میں شامل کرنے کا مطالبہ کیا گیا ہے۔