بی جے پی سے نکلے سریندر چودھری کو رویند رینا کا ہتک عزت نوٹس

جموں//
جموں کشمیر بی جے پی کے صدر رویندر رینا نے پیر کو سابق ایم ایل سی‘ سریندر چودھری کو حال ہی میں پارٹی چھوڑنے کے دوران ان کے خلاف کیے گئے تبصروں کے لیے ہتک عزت کا نوٹس جاری کیا۔
رینا نے عوام اور پارٹی صفوں میں اپنی ساکھ کو نقصان پہنچانے کی کوششوں کے لیے چودھری سے ایک ہفتے کے اندر غیر مشروط معافی مانگی اور ڈیڈ لائن ختم ہونے کے بعد ان کے خلاف ۵کروڑ روپے کے ہتک عزت کے مقدمے کا انتباہ دیا۔
چودھری نے گزشتہ سال۳۰مارچ کو پیپلز ڈیموکریٹک پارٹی چھوڑ دی اور ایک ہفتے کے اندر ہی بی جے پی میں شامل ہو گئے تھے‘ تاہم انہوں نے بی جے پی چھوڑ کر اس سال۷جولائی کو نیشنل کانفرنس میں شمولیت اختیار کی۔
چودھری نے اپنے ٹویٹر ہینڈل پر بی جے پی چھوڑنے کے اپنے فیصلے کا اعلان کیا اور رینا پر الزامات لگائے۔
رینا نے کہا’’میں نے اپنے وکیل کے ذریعے چودھری کو قانونی نوٹس بھجوایا ہے۔ میرے خلاف بے بنیاد الزامات لگانے کا مقصد صرف پارٹی اور عوام میں میری ساکھ کو نقصان پہنچانا ہے۔ وہ ایک ہفتے کے اندر معافی مانگے یا قانونی کارروائی کی تیاری کریں‘‘۔
چوہدری کو بھیجی گئی قانونی نوٹس میں کہا گیا ہے’’آپ کسی بھی سیاسی جماعت کا انتخاب کر سکتے ہیں جو آپ کے عزائم کے مطابق ہو، پھر بھی ۱۱جولائی کو ٹویٹ میں الفاظ کا چناؤ خالصتاً نامناسب ہے، بلکہ میرے مؤکلوں اور بی جے پی کے لیے ہتک آمیز ہے، حالانکہ آپ اچھی طرح جانتے ہیں کہ میرا مؤکل کسی مبینہ کارروائیاں میں ملوث نہیں تھا۔‘‘ (ایجنسیاں)