دفعہ ۳۷۰آئین میں عارضی تھی جس کو ہٹانے میں کانگریس ناکام ہوئی:جتندر

سرینگر//
بی جے پی کے سینئر لیڈر اور مرکزی وزیر ڈاکٹر جتندرا سنگھ کا کہنا ہے کہ جموں کشمیر میں وزیر اعظم نریندر مودی نے پہلی بار تین سطحی پنچایتی نظام قائم کیا۔
سنگھ نے کہا کہ دفعہ ۳۷۰؍آئین میں عارضی تھی جس کو ہٹانے میں کا نگریس ناکام ہوئی لیکن بی جے پی نے اس کو ہٹا دیا۔
مرکزی وزیر نے ان باتوں کا اظہار پیر کے روز یہاں نامہ نگاروں کے سوالوں کے جواب دینے کے دوران کیا۔
سنگھ نے کہا’’جموں و کشمیر میں پہلی بار وزیر اعظم نریندر مودی نے زمینی سطح پر جمہوریت قائم کی جو یہاں پہلے نہیں تھی‘‘۔
دفعہ۳۷۰کی تنسیخ کے بارے میں پوچھے جانے پر ان کا کہنا تھا کہ یہ دفعہ آئین میں عارضی تھی جس کو بی جے پی نے ہٹایا۔
مرکزی وزیر نے کہا’’جس آئین میں دفعہ۳۷۰لکھا ہوا تھا اسی آئین میں یہ بھی لکھا تھا کہ یہ دفعہ عارضی ہے بلکہ ملک کے پہلے وزیر اعظم پنڈت جواہر لال نہرو نے بھی آئین ساز اسمبلی میں کہا تھا کہ یہ دفعہ عارضی ہے اور یہ ختم ہوگا‘‘۔
سنگھ کا کہنا تھا کہ کانگریس کی حکومتیں اپنے سیاسی مفادات کے پیش نظر اس کو نہیں ہٹا سکے جس کو بعد میں بی جے پی نے ہٹا دیا جس کیلئے کانگریس کو بی جے پی کا شکر گذار رہنا چاہئے ۔
یونفارم سول کوڈ کے بارے میں پوچھے جانے پر سنگھ نے کہا’’اس پر بات چیت چل رہی ہے ۔‘‘
سنگھ نے کہا’’جس طرح سے عالمی برادری میں ہندوستان کی حیثیت میں اضافہ ہوا ہے اور جس طرح سے مودی دنیا کے سب سے بڑے لیڈر کے طور پر ابھرے ہیں۔ عالمی رہنما یہ جاننے کے لیے بے چین ہیں کہ کچھ اہم مسائل پر ہندوستان کا موقف کیا ہوگا۔ ‘‘