بڈگام سڑک حادثے میں موٹر سائیکل سوار از جان

سرینگر//
وسطی کشمیر کے ضلع بڈگام کے سوئیہ بگ علاقے میں منگل کی صبح ٹپر کی ٹکر سے ایک موٹر سائیکل سوار کی موت واقع ہوگئی جبکہ جنوبی کشمیر کے ضلع اننت ناگ کے اچھ بل علاقے میں ایک نالے سے ایک شخص کی لاش بر آمد کی گئی۔
سرکاری ذرائع نے بتایا کہ بڈگام کے سوئیہ بگ علاقے میں منگل کی صبح ایک ٹپر کی ٹکر سے ایک موٹر سائیکل سوار شدید زخمی ہوگیا۔انہوں نے بتایا کہ گرچہ موٹر سائیکل سوار کو نازک حالت میں ضلع ہسپتال بڈگام پہنچایا گیا لیکن وہاں ڈاکٹروں نے اس کو مردہ قرار دیا۔
متوفی کی شناخت اشفاق مجید ساکن پائمس بڈگام کے بطور ہوئی ہے ۔پولیس نے اس ضمن میں ایک کیس درج کرکے تحقیقات شروع کی ہیں۔
اس دوران جموں صوبہ کے ڈوڈہ ضلع کے ٹھاٹھری کلہو تران شاہراہ پر ایک ٹرک ڈرائیور کے قابو سے باہر ہو کر گہری کھائی میں جاگرا جس کے نتیجے میں ٹرک میں سوار دو افراد غرقہ آب ہوئے جن کی بڑے پیمانے پر تلاش شروع کی گئی ۔
اطلاعات کے مطابق ڈوڈہ میں منگل کی صبح چھ بجے کے قریب ایک مال بردار ٹرک دریا میں جاگرا جس وجہ سے دو افراد کو پانی کے تیز بہاو نے بہا کر لیا۔
حادثے کی ا طلاع ملتے ہی پولیس اور مقامی لوگ جائے موقع پر پہنچے اور ریسکیو آپریشن شروع کیا ۔غرقہ آ ب ہوئے افراد کی شناخت لال حسین ولد امانت علی اور ریاض احمد ساکن سانبہ کے بطور ہوئی ہے ۔
بتادیں کہ پچھلے چوبیس گھنٹوں کے دوران صوبہ جموں میں تین الگ الگ حادثات میں۱۶؍افراد از جان جبکہ۶۰کے قریب زخمی ہوئے ہیں۔
اس دوران جنوبی کشمیر کے ضلع پلوامہ میں منگل کی صبح مبینہ طور ٹرین کی زد میں آکر ایک شخص شدید زخمی ہوگیا۔
ذرائع نے بتایا کہ پلوامہ میں پنزگام ریلوے اسٹیشن پر ایک شخص ٹرین کی زد میں آکر شدید زخمی ہوگیا۔انہوں نے کہا کہ زخمی شخص کو نازک حالت میں نزدیکی ہسپتال پہنچایا گیا۔
زخمی کی شناخت شکیل احمد ڈار ولد محمد یوسف ڈار ساکن نائینہ بٹہ پورہ پلوامہ کے بطور کی گئی ہے ۔
دریں اثنا ریلوے حکام نے واقعے کی تصدیق کرتے ہوئے کہا اس ضمن میں ایک کیس درج کرکے تحقیقات شروع کی گئی ہیں۔
دریں اثنا جنوبی کشمیر کے ضلع اننت ناگ کے اچھ بل علاقے میں منگل کی صبح ایک شخص کی لاش بر آمد کی گئی۔
ذرائع نے بتایا کہ مقامی لوگوں نے یہ لاش ایک ایک نالے کے قریب پائی اور فوری طور پر اس کے متعلق پولیس کو مطلع کیا۔انہوں نے بتایا کہ اطلاع موصول ہوتے ہی پولیس کی ایک ٹیم جائے موقع پر پہنچی اور لاش کو قانونی و طبی لوازمات کی ادائیگی کے لئے اپنی تحویل میں لے لیا۔
متوفی کی شناخت۵۵سالہ محمد امین ڈار ساکن تھجی وار اچھ کے بطور ہوئی ہے ۔