نئی دہلی// اندرا گاندھی بین الاقوامی ہوائی اڈے سے حج بیت اللہ کے لیے پروازوں کا سلسلہ 22/مئی 2023 سے شروع ہوگیا ۔ یہ امبارکیش پوائنٹ ہندوستان کے سب سے بڑے روانگی حج کا سفری مقام ہے ۔
اس موقع پر دہلی اسٹیٹ حج کمیٹی کی جانب سے عازمین کے استقبال کے لیے ایک شاندار افتتاحی تقریب کا اہتمام کیا گیا، جس میں وزیر مملکت برائے امور خارجہ، حکومت ہند مناکشی لیکھی، قومی دارالحکومت علاقہ دہلی کے لیفٹیننٹ گورنر ونے کمار سکسینہ اور ہندوستان میں سعودی عرب کی حکومت کے سفیر صالح بن عید حسینی، دہلی اسٹیٹ حج کمیٹی کی چیئرپرسن محترمہ کوثر جہاں موجود تھیں۔ محترمہ مناکشی لیکھی نے تقریب میں موجود عازمین کرام کو حج بیت اللہ پر روانگی کے لئے مبارکباد پیش کرتے ہوئے اپنی وزارت اور حکومت ہند کی جانب سے اندرون ہند اور سعودی عرب میں حج کے دوران فراہم کی جانے والی تمام سہولیات کی بروقت فراہمی کی یقین دہانی کرائی۔
مسٹر ونے کمار سکینہ نے حج بیت اللہ کے لیے روانہ ہونے والے عازمین کو دہلی امبارکیشن پوائنٹ سے روانہ ہونے والے صوبہ دہلی کے علاوہ، چھ دیگر ریاستوں اتر پردیش، اتراکھنڈ، ہریانہ، پنجاب، ہماچل پردیش اور چندی گڑھ کے تقریباً 22 ہزار مسافروں کے لیے دہلی حکومت اور دہلی اسٹیٹ حج کمیٹی کی طرف سے کئے گئے انتظامات پر اع طمینان کا اظہار کرتے ہوئے انہیں ہر طرح کی سہولیات فراہم کرنے کا یقین دلایا۔
ہندوستان میں تعینات حکومت سعودی عرب کے سفیر صالح بن عید الحسینی نے حکومت سعودیہ کی طرف سے عازمین حج کے لئے کئے گئے انتظامات پر تفصیلی روشنی ڈالتے ہوئے بتایا کہ سعودی عرب کی حکومت نے گزشتہ برسوں میں بھی ہندوستانی عازمین کا پورا خیال رکھا ہے اور اس سال بھی اس میں کسی قسم کی کمی اور کوتاہی نہیں ہونے دی جائے گی۔
ہوائی اڈے پر منعقدہ افتتاحی تقریب میں حج کمیٹی کے رکن محمد سعد اور دیگر عملے کی موجودگی میں دہلی اسٹیٹ حج کمیٹی کی چیئرپرسن محترمہ کوثر جہاں نے سب سے پہلے تمام معزز مہمانوں اور تقریب کے شرکاء کا خیرمقدم کیا ۔ جبکہ دہلی اسٹیٹ حج کمیٹی کے ایگزیکٹیو آفیسر اشفاق احمد عارفی نے تقریب میں نظامت کے فرائض انجام دیئے ۔
خیال رہے کہ عازمین حج کی دوسری پرواز صبح 11:30 بجے روانہ ہوئی جبکہ مزید پروازیں شام 06:30 اور رات 08:30 پر بجے روانہ ہو ئیں۔