اسکول بس فیس میں۱۲فیصد اضافہ کرنے کی اجازت

سرینگر//پرائیوٹ سکولوں کی کمیٹی فار فیس فکزیشن اینڈ ریگولیٹری کمیٹی (ایف ایف آر سی ) نے نجی اسکولوں کو ٹرانسپورٹ فیس میں بارہ فیصد اضافہ کرنے کی اجازت دی ہے۔سکولوں کے فیس کے تعین اور ضابطے کی کمیٹی (ایف ایف آر سی ) نے جمعے کے روز ایک حکم نامہ جاری کیا جس کے تحت پرائیوٹ اسکول انتظامیہ کو ٹرانسپورٹ فیس میں۱۲ فیصد اضافہ کرنے کی اجازت دی گئی ہے۔ایف ایف آر سی کے مطابق نجی اسکولوں کی انتظامیہ کو ٹرانسپورٹ فیس میں بارہ فیصد اضافہ کرنے کی اجازت دی گئی ہے جو کہ ونٹر زون میں اکتوبر۲۰۱۹ اور سمر زون میں فروری۲۰۲۰ میں ٹرانسپورٹ کی سہولت حاصل کرنے والے طلبا ادا کر رہے تھے۔فکزیشن کمیٹی کی جانب سے جاری حکمنامے میں واضح کیا گیا ہے کہ یہ حکم اسکولوں کے دوبارہ کھلنے کی تاریخ سے عمل میں آئے گا۔حکمنامے میں مزید کہا گیا ہے کہ کوئی بھی اسکول ٹیوشن فیس، ٹرانسپورٹ فیس یا کسی دوسرے فیس کی پیشگی ادائیگی کیلئے والدین سے کسی قسم کا معاہدہ نہیں لے گا۔انہوں نے بتایا کہ والدین کو یہ اختیار دیا گیا ہے کہ وہ ماہانہ یا سہ ماہی بنیادوں پر اسکولوں میں فیس جمع کریں۔بتادیں کہ سکولوں کے فیس کے تعین اور ضابطے کی کمیٹی (ایف ایف آر سی ) میں والدین نے تحریری طورپر شکایت درج کی ہے کہ نجی اسکول انتظامیہ نے ٹرانسپورٹ فیس میں از خود اضافہ کردیا ہے جو قواعد و ضوابط کی کھلم کھلا خلاف ورزی ہے۔فیس فیکزیشن کمیٹی کا کہنا ہے کہ والدین کی جانب سے اْنہیں تحریری طورپر شکایت موصول ہوئی تھی کہ نجی اسکول انتظامیہ نے ٹرانسپورٹ فیس میں پچاس فیصد تک اضافہ کردیا ہے اور یہ کہ والدین سے پیشگی میں ہی فیس جمع کرنے کے بارے میں بھی دباو ڈالا جا رہا ہے۔کمیٹی نے بتایا کہ متعدد شکایتیں موصول ہونے کے بعد فیس فیکزیشن کمیٹی کی ایک میٹنگ ۹مارچ۲۰۲۲ کو منعقد ہوئی جس دوران فیصلہ لیا گیا کہ پرائیوٹ اسکول انتظامیہ صرف بارہ فیصد تک ہی ٹرانسپورٹ فیس میں اضافہ کرسکتے ہیں۔