’جی ٹونٹی اجلاس:سیاحت اور معیشت کو فروغ ملے گا‘

سرینگر//
جموںکشمیر کے لیفٹیننٹ گورنر ‘منوج سنہا کا کہنا ہے کہ سرینگر میں ۲۲مئی سے شروع ہونے والے جی ٹونٹی اجلاس سے کشمیر کی روایتی مہمان نوازی بین الاقوامی سطح پر متعارف ہوگی۔
سنہا نے کہا کہ اس اجلاس سے یہاں کی سیاحت اور معیشت کو بھی بہت بڑا فروغ ملے گا۔
لیفٹیننٹ گورنر نے ان باتوں کا اظہار ہفتے کو یہاں راج باغ میں جہلم راج باغ ریور فرنٹ کا افتتاح کرنے کے بعد نامہ نگاروں کے ساتھ بات کرنے کے دوران کیا۔
سنہا نے کہا’’میں سری نگر اور کشمیر کے لوگوں کو جہلم ریور فرنٹ تیار ہونے پر مبارک باد دیتا ہوں۶کلو میٹروں پر محیط یہ سٹریچ تیار ہوا ہے اور دوسرے طرف کا کام بھی آگے شروع کیا جائے گا‘‘۔
ایل جی کا کہنا تھا کہ سرینگر شہر آبی ذخائر کے کناروں پر ہی آباد ہے اور یہاں کی روایتی وراثت یا معیشت بھی پانی پر ہی منحصر تھی۔
سنہا نے کہا کہ سمارٹ سٹی کے تحت سری نگر کو بین الاقومی سطح کے معیار پر تیار کیا جا رہا ہے ۔انہوں نے کہا’’اس کیلئے تمام تر سہولیات کو فراہم کیا گیا ہے بچوں کے لئے فری وائی فائی زونز، سائیکل ٹریکس، پیدل چلنے کے راستے ، کیفے وغیرہ بھی دستیاب رکھے گئے ہیں اور بہت جلد شہر میں ایک لائبریری بھی قائم کی جائے گی‘‘۔
جی ٹونٹی اجلاس کے بارے میں پوچھے جانے والے ایک سوال کے جواب میں ان کا کہنا تھا’’جموںکشمیر انتظامیہ نے۲۲مئی کو شروع ہونے و الے اس ایونٹ کیلئے تمام تر انتظام کئے ہیں جس میں یہاں کے لوگوں کا بھی تعاون ہے ‘‘۔
لیفٹیننٹ گورنر نے کہا کہ ہم سب لوگ ایک شاندار تقریب کا اہتمام کر رہے ہیں جس سے آنے والے دنوں میں یہاں کے شعبہ سیاحت کو بھی فروغ ملے گا اور سرمایہ کاری بھی بڑھے گی۔
ان کا کہنا تھا’’جو کشمیر کی روایتی مہمان نوازی ہے اس کو بھی پوری دنیا دیکھ سکے گی‘‘۔انہوں نے وزیر اعظم نریندر مودی کا شکر گذار ہوں جنہوں نے اس ایونٹ کے لئے جموں وکشمیر کو چنا۔
قابل ذکر ہے کہ سرینگر سمارٹ سٹی پروجیکٹ کے تحت آراستہ و پیراستہ جہلم ریور فرنٹ صبح و شام کے وقت خوشگوار ہوا اور پر سکون ماحول اور خوش کن مناظر سے لطف اندوز ہونے کے لئے ایک اور نئی پسندیدہ جگہ بن گئی ہے ۔