مقبوضہ کشمیر میں مقیم ۵ جنگجوؤں کی ڈوڈہ میں رہائشگاہوں پر چھاپے

جموں//
جموں کشمیر پولیس کے اسپیشل انویسٹی گیشن یونٹ (ایس آئی یو) نے ہفتہ کو پانچ مقامی دہشت گردوں کے گھروں پر چھاپہ مارا جو اس وقت سرحد پار سے کام کر رہے ہیں اور ڈوڈہ ضلع میں عسکریت پسندی کو بحال کرنے کی مایوس کن کوششیں کر رہے ہیں۔
ڈوڈہ ضلع کے سینئر سپرنٹنڈنٹ آف پولیس عبدالقیوم نے کہا کہ ایس آئی یو کے ذریعہ گنڈوہ علاقے میں چھاپے مارے گئے جس میں۲۰۲۱میں پانچ دہشت گردوں کے خلاف تعزیرات ہند کی مختلف دفعات اور غیر قانونی سرگرمیاں (روک تھام) ایکٹ کے تحت مقدمہ درج کیا گیا تھا۔
قیوم نے کہا کہ تلاشیوں سے شواہد اکٹھے کرنے اور ان کے حامیوں اور ہمدردوں کی شناخت میں مدد ملے گی جو اوور گراؤنڈ ورکرز کے طور پر کام کر رہے ہیں۔
جن دہشت گردوں کے گھروں کی تلاشی لی گئی ان میں عطا محمد عرف عادل مبشر‘ محمد یاسر عرف شاہد‘ محمد شفیع عرف ندیم بھائی ‘ امجد علی عرف راشداور ماجد حسین عرف ابو زاہد ثاقب شامل ہیں۔
پولیس آفیسر نے کہا’’یہ تمام مقامی دہشت گرد ۱۹۹۰ کی دہائی کے اوائل میں پاکستان کے زیر قبضہ جموں و کشمیر میں جا چکے ہیں اور فی الحال پاکستان سے کام کر رہے ہیں۔ وہ مقامی نوجوانوں سے ورچوئل موڈ کے ذریعے رابطہ کرکے اور انہیں عسکریت پسندی میں شامل ہونے کیلئے اکسانے کے ذریعے ڈوڈہ میں عسکریت پسندی کو بحال کرنے کی مایوس کن کوششیں کررہے ہیں۔‘‘