جموں/۲۱مئی
جموں وکشمیرکے پونچھ ضلع کے مینڈھر علاقے میں مشتبہ افراد کی نقل وحرکت کے بعد فوج نے فائرنگ کی تاہم اس دوران کسی کے ہلاک ہونے کے بارے میں کوئی اطلاع موصول نہیں ہوئی۔
اطلاعات کے مطابق مینڈھر پونچھ کے کیری گلوٹھا میں فوج نے خفیہ اطلاع موصول ہونے کے بعد تلاشی آپریشن شروع کیا۔ذرائع نے بتایا کہ اتوار اعلیٰ الصبح مشتبہ افراد کی نقل وحرکت پر فوج کی پیٹرولنگ پارٹی نے فائرنگ کی۔
معلوم ہوا ہے کہ فوج نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔ذرائع نے مزید بتایا کہ علاقے کی اور جانے والی سڑکوں کو سیکورٹی فورسز نے پوری طرح سے سیل کیا ہے ۔
آخری اطلاعات موصول ہونے تک علاقے میں تلاشی آپریشن جاری تھا۔اس سلسلے میں مزید تفصیلات کا انتظار ہے ۔
