ویرات کوہلی کو اصل کنگ کہنے پر بابر اعظم کے مداحوں نے محمد عامر کو ٹرول کردیا

لاہور//
ہندوستان کے سابق کپتان ویرات کوہلی کی شاندار سنچری کی بدولت رائل چیلنجرز بنگلور نے جمعرات کو آئی پی ایل میں سن رائزرز حیدرآباد کو آٹھ وکٹوں سے شکست دی۔ کوہلی نے اپنی اننگز کا آغاز لگاتار دو چوکوں کے ساتھ کیا اور مزید 10 چوکے اور چار چھکے لگائے۔ انہوں نے بھونیشور کمار کی گیند پر ڈیپ مڈ وکٹ پر چھکا لگا کر 2019ء کے بعد 62 گیندوں پر اپنی پہلی اور مجموعی طور پر چھٹی آئی پی ایل سنچری سکور کی ۔
محمد عامر جو کوہلی کو خصوصی خراج تحسین پیش کرنے کے لیے ٹوئٹر پر گئے۔ انہوں نے کیپشن کے ساتھ کوہلی کی ایک تصویر پوسٹ کی کہ ’’ اصلی کنگ ویرات کوہلی نے کیا شاندار باری کھیلی‘‘۔
بابر اعظم کے مداح پاکستان کے کپتان کو ‘کنگ بھی کہتے ہیں اور ان کا خیال تھا کہ یہ سابق فاسٹ بولر کی طرف سے ان کے لیے بالواسطہ تنقید ہے۔
اس سال پی ایس ایل کے دوران عامر اور بابر کے درمیان گرما گرم لمحات تھے اور بائیں ہاتھ کے فاسٹ بولر کے پاکستانی کپتان کے حوالے سے ایک بیان نے ان کے مداحوں کو ناراض کردیا۔ عامر نے حال ہی میں اپنے بیان کی وضاحت کرتے ہوئے کہا کہ انہوں نے کبھی بھی پاکستانی کپتان کو اوسط درجے کا کھلاڑی یا ٹیلنڈر نہیں کہا۔
"سب سے پہلے، میں ان لوگوں سے پوچھنا چاہتا ہوں جنہوں نے اس معاملے کو غلط انداز میں پیش کیا ہے۔ مجھے ایک انٹرویو دکھائیں جس میں میں نے کہا ہو کہ بابر ایک اوسط درجے کا کھلاڑی ہے یا ٹیلنڈر۔ میں نے انہیں پاکستان کا بہترین بلے باز کہا ہے، میں اپنے منہ سے کہہ رہا ہوں اور کئی جگہ کہہ چکا ہوں کہ ان کی تکنیک کی وجہ سے ون ڈے اور ٹیسٹ میچوں میں ان کے خلاف بولنگ کرنا مشکل ہے تو کیا میں انہیں ٹیلنڈر کہوں گا؟ "۔