شادی پر دونوں ملکوں میں اتنی زیادہ توجہ صرف اور صرف ثانیہ مرزا کی وجہ سے ملی : شعیب ملک

لاہور// قومی کرکٹ ٹیم کے اسٹار آل رائونڈر شعیب ملک نے اپنی شادی پر میڈیا کوریج اور لوگوں کی توجہ ملنے سے متعلق اظہارِ خیال کیا ہے۔ شعیب ملک اور بھارت کی سابق ٹینس اسٹار ثانیہ مرزا کی شادی 12 اپریل 2010ء میں ہوئی جس پر پاکستان سمیت بھارتی میڈیا پر بھی خبروں کا طوفان آگیا تھا، مداح دونوں سے متعلق جاننے میں دلچسپی کا اظہار کر رہے تھے۔
اس حوالے سے حال ہی میں ایک انٹرویو کے دوران شعیب ملک سے سوال کیا گیا کہ جب آپ دونوں کی شادی ہوئی تو پاکستان اور بھارتی میڈیا پر خبریں ہی خبریں تھیں، تو شادی کے فورا بعد آپ کو احساس نہیں ہوا کہ یہ کچھ زیادہ ہی ہوگیا یا آپ اس کی امید کررہے تھی ۔ جواب میں آل راونڈر نے کہا کہ دونوں ملکوں میں جو توجہ ملی، وہ صرف اور صرف ثانیہ مرزا کی وجہ سے ملی، اس میں کوئی شک نہیں کہ وہ سپر ڈوپر اسٹار ہیں، شادی پر ہمیں سب توجہ صرف ثانیہ مرزا کی وجہ سے ہی ملی۔
اہلیہ کی کامیابی سے متعلق سوال کے جواب میں شعیب ملک نے کہا کہ اگر آپ کسی کو پسند نہیں کرتے اور اس کو کامیابی ملے، تو کوشش ضرور کرنی چاہیے کہ آپ خوشی دکھائیں۔ کرکٹر نے کہا کہ اگر کوئی آپ کا اپنا ہو اور اسے کامیابی ملے پھر تو آپ کے پائوں زمین پر نہیں ٹکنے چاہئیں، وہ چاہے آپ کی بہن ہو، اہلیہ ہو، ماں ہو یا چاہے ساس ہو۔ انہوں نے کہا کہ اس معاملے میں توازن برقرار رہنا چاہیے، مرد کو اوپر نہیں ہونا چاہیے، دونوں کو ساتھ چلنا چاہیے۔