سرینگر//
جموں و کشمیر کے لیفٹیننٹ گورنر منوج سنہا نے جمعہ کو کہا کہ انہوں نے سی یو ای ٹی امتحانی مراکز کا معاملہ مرکزی وزیر تعلیم دھرمیندر پردھان کے ساتھ اٹھایا ہے۔
ایل جی کے دفتر نے اپنے آفیشل ٹویٹر پر ہینڈل پر کہا کہ سنہا نے مرکزی وزیر سے جموں و کشمیر میں سی یو ای ٹی مراکز قائم کرنے کی درخواست کی۔انہوں نے کہا کہ مرکزی وزیر نے انہیں یقین دلایا ہے کہ اس مسئلہ کو ترجیحی بنیادوں پر حل کیا جائے گا۔
ٹویٹ میں کہا گیا ’’شیڈول کامن یونیورسٹی انٹرنس ٹیسٹ (سی یو ای ٹی) کے امتحانی مراکز سے متعلق معاملے پر مرکزی وزیر تعلیم دھرمیندر پردھان سے تبادلہ خیال کیا اور ان سے جموں کشمیر میں سی یو ای ٹی مراکز کے لیے درخواست کی۔ انہوں نے یقین دلایا ہے کہ اس مسئلے کو ترجیحی بنیادوں پر حل کیا جائے گا‘‘۔
قبل ازیں، جموں و کشمیر کے امیدوار، جو مختلف کورسز کیلئے سی یو ای ٹی امتحانات میں شرکت کرنے جا رہے ہیں، نے مرکز کے زیر انتظام علاقوں سے باہر امتحانی مراکز کی الاٹمنٹ پر تشویش کا اظہار کیا۔
جموں و کشمیر سے باہر امتحانی مراکز کی الاٹمنٹ پر ردعمل کے بعد، علاقائی سیاسی جماعتوں نے بھی تشویش کا اظہار کیا اور حکومت پر زور دیا کہ وہ اس مسئلے کو جلد از جلد حل کرے۔
