جموں//
سرینگر میں جی۲۰میٹنگ سے پہلے، جموں خطے میں، خاص طور پر سرحدی اضلاع میں سیکورٹی سخت کر دی گئی ہے، اور۱۰سے زیادہ آرمی اسکولوں کو احتیاطی اقدامات کے تحت بند کر دیا گیا ہے۔
حکام نے جمعرات کو بتایا کہ سیکورٹی ایجنسیوں نے دراندازی کے راستوں کی نشاندہی کی ہے اور سرحد پار سے کسی بھی دراندازی کو روکنے کے لیے سیکورٹی بڑھا دی ہے۔
تیسرا جی۲۰ ٹورازم ورکنگ گروپ میٹنگ ۲۲سے۲۴مئی تک سری نگر میں ڈل جھیل کے کنارے واقع شیرِ کشمیر انٹرنیشنل کانفرنس سینٹر (ایس کے آئی سی سی) میں منعقد ہوگا۔
حکام نے بتایا کہ جموں میں خاص طور پر سرحدی اضلاع میں اور تمام اہم فوج اور سیکورٹی اداروں کے ارد گرد سیکورٹی بڑھا دی گئی ہے۔انہوں نے کہا کہ بین الاقوامی سرحد (آئی بی) اور لائن آف کنٹرول (ایل او سی) کے ساتھ ساتھ دیہی دفاعی کمیٹیوں کے علاوہ فوج، بارڈر سیکورٹی فورس، پولیس اور سنٹرل ریزرو پولیس فورس کی کثیر سطحی سیکورٹی کو فعال کر دیا گیا ہے۔
حکام کے مطابق جموں،پٹھانکوٹ ہائی وے کے ساتھ ساتھ سیکورٹی اور چوکیوں کو بھی مضبوط کیا گیا ہے، تمام گاڑیوں کی جانچ کی جا رہی ہے اور تمام نقل و حرکت پر نظر رکھی جا رہی ہے۔خطرے کے ادراک کے پیش نظر، حکام نے بتایا کہ ہائی وے پر اور راجوری اور پونچھ کے سرحدی اضلاع میں ۱۰سے زیادہ آرمی اور دیگر اسکولوں کو بند کر دیا گیا ہے اور طلباء کے لیے ۲۵ مئی تک آن لائن کلاسز کا انعقاد کیا جائے گا۔
ایک ایڈوائزری میں، پولیس نے لوگوں پر زور دیا کہ وہ چوکس رہیں اور اپنی گاڑیوں کو شروع کرنے سے پہلے چیک کریں۔عہدیداروں نے بتایا کہ جموں کے داخلی مقامات پر گاڑیوں کی چیکنگ اور لوگوں کی تلاشی لی جارہی ہے۔
پونچھ اور راجوری میں۲۰؍اپریل اور۵مئی کو ہونے والے حملوں میں ملوث دہشت گردوں کا سراغ لگانے کیلئے محاصرے اور تلاشی کی کارروائیاںجاری ہیں جن میں حکام کے مطابق، پانچ پیرا ٹروپروں سمیت ۱۰فوجی مارے گئے تھے۔
اس دوران جموںکشمیر کی سرمائی راجدھانی جموں میں جمعرات کی شام جگہ جگہ چیک پوائنٹس قائم کئے گئے جہاں پر نجی گاڑیوں اور موٹر سائیکلوں کو روک کر ان کی باریک بینی سے تلاشی لی جارہی ہے۔
معلوم ہوا ہے کہ پولیس کو ہدایت دی گئی ہے کہ مشتبہ افراد کو دیکھتے ہی انہیں دھر دبوچ کر سلاخوں کے پیچھے دھکیل دیا جائے۔
اطلاعات کے مطابق جمعرات کی شام جموں شہر میں سیکورٹی کا جال بچھایا گیا اور جگہ جگہ چیک پوائنٹس قائم کئے گئے جہاں پر نجی گاڑیوں اور موٹر سائیکلوں کو روک کر ان میں سوار افراد کے شناختی کارڈ چیک کئے جارہے ہیں۔
ذرائع نے بتایا کہ مسافر بردار اور نجی گاڑیوں میں سوار افراد سے پوچھ تاچھ کے بعد ہی انہیں آگے جانے کی اجازت دی جارہی ہے۔
ذرائع کا کہنا ہے کہ امکانی حملوں کو ٹالنے کی خاطر جموں شہر میں سیکورٹی کے غیر معمولی انتظامات کئے گئے ہیں۔ جی ٹونٹی میٹنگ کے پیش نظر جموں بھر میں سیکورٹی کو الرٹ پر رہنے کی ہدایت دی گئی۔
سراغ رساں ایجنسیوں نے الرٹ جاری کیا ہے کہ ملی ٹینٹ تخریبی کارروائیوں کو انجام دینے کی فراق میں ہیں جس کے پیش نظر سیکورٹی کے سخت انتظامات کئے جائے۔
سیکورٹی فورسز کو ہدایت دی گئی ہے کہ مشکوک نظر آنے والے افرادکو فوری طورپر سلاخوں کے پیچھے دھکیل دیا جائے۔