ون ڈے میچز میں نسیم شاہ کا ایک اور ریکارڈ

کراچی//
پاکستان کے نوجوان فاسٹ بولر نسیم شاہ ہر گزرتے ون ڈے میچ کے ساتھ سب سے زیادہ وکٹوں کا ریکارڈ اپنے نام کرتے جارہے ہیں، اس مرتبہ انہوں نے ابتدائی 6 میچوں میں سب سے زیادہ وکٹیں لینے کا ریکارڈ بھی اپنے نام کرلیا۔
راولپنڈی میں نیوزی لینڈ کے خلاف ون ڈے سیریز کے پہلے میچ میں نسیم شاہ نے دو وکٹیں لے کر یہ اعزاز اپنے نام کیا۔
نسیم شاہ نے کیریئر کے 6 ابتدائی میچز میں 20 وکٹیں حاصل کرلیں، اور اس میچ میں ہی موجود نیوزی لینڈ کے فاسٹ بولر میٹ ہینری کا ریکارڈ توڑا۔
میٹ ہینری نے ابتدائی 6 میچز میں 19 وکٹیں حاصل کی تھیں، بنگلادیش کے مستفیض الرحمٰن نے ابتدائی 6 ون ڈے میں 18 وکٹیں لی تھیں۔
عمران طاہر، ریان ہیرس، ظہور خان اور عبادت حسین نے 17، 17 وکٹیں لی تھیں۔
واضح رہے کہ نسیم شاہ ابتدائی 4 اور 5 میچز میں بھی سب سے زیادہ وکٹیں لینے کا ریکارڈ رکھتے ہیں۔
نوجوان بولر نے چار میچز میں 15 اور پانچ میچز کے بعد 18 وکٹیں مکمل کی تھیں۔