سمیع-سراج کے بعد راہل-رویندر چلے ، ہندستان نے پانچ وکٹ سے جیت حاصل کی

ممبئی//گیند بازوں کی زبردست کارکردگی کے بعد کے ایل راہل (ناٹ آؤٹ 75) اور رویندر جڈیجہ (ناٹ آؤٹ 45) نے یادگار سنچری پارٹنرشپ کی بدولت ہندوستان نے آسٹریلیا کے خلاف جمعہ کو پہلے ون ڈے میں پانچ وکٹ سے جیت درج کی۔
12 سال بعد وانکھیڑے اسٹیڈیم میں ہندوستان کی یہ پہلی جیت ہے۔ اس جیت کے ساتھ ہی ہندوستان نے تین سال قبل اس گراؤنڈ پر آسٹریلیا سے ملی شکست کا بدلہ بھی لے لیا۔
آسٹریلیا نے پہلے بلے بازی کرتے ہوئے تمام دس وکٹوں کے نقصان پر 188 رن بنائے اور ہندوستان کو جیتنے کے لئے 189 رن کا ہدف دیا جس کا تعاقب کرتے ہوئے ٹیم انڈیا صرف 83 رن پر اپنے پانچ اہم وکٹ گنوانے کے بعد مشکل میں نظر آئی۔لیکن کریز پر آئے آل راؤنڈر جڈیجہ نے ایک سرے پر مضبوطی سے کھڑے رہ کر ایل راہل کا بخوبی ساتھ دیتے ہوئے ہندستان کو فتح کے دروازے تک پہنچا دیا۔ دونوں بلے بازوں نے آسٹریلیائی باؤلنگ اٹیک کا مقابلہ کرنے کے لیے ہمت کا مظاہرہ کیا اور 61 گیندیں باقی رہتے میچ اپنے نام کر لیا۔
راہل کی فارم میں واپسی کے ساتھ ہی انہوں نے وانکھیڑے میں کھیلی گئی اننگز کو یادگار بنا دیا۔ انہوں نے کریز پر 176 منٹ گزارے اور 91 گیندوں میں سات چوکے اور ایک چھکا لگایا، جب کہ دوسرے سرے پر جڈیجہ نے ٹیم میں اپنی افادیت ثابت کرتے ہوئے نہ صرف دو آسٹریلیائی وکٹیں حاصل کیں بلکہ مشکل میں پھنسی ٹیم کو بلے سے مالا مال کرتے ہوئے مسکرانے کا موقع دیا۔
ایشان کشن (3)، وراٹ کوہلی (4) اور دھماکہ خیز سوریا کمار یادیو (0) کے آؤٹ ہونے کے بعد ہندوستان کی حالت پتلی ہوگئی تھی۔ بعد ازاں شبھمن گل (20) اور ہاردک پانڈیا (25) کے پویلین لوٹنے کے بعد آسٹریلیائی کیمپ میں جوش و خروش کی لہر دوڑ گئی تاہم ٹیم کی بیٹنگ کی گہرائی پھر سے نظر آئی اور مہمانوں کو مایوسی ملی۔
اس سے قبل ٹاس جیتنے کے بعد ہندوستانی کپتان ہاردک پانڈیا نے آسٹریلیا کو پہلے بیٹنگ کی دعوت کو صحیح ثابت کیا محمد سراج (29رن پر 3وکٹیں) اور محمد سمیع (17رن پر 3وکٹیں) لیں، جس کی وجہ سے آسٹریلیا کی اننگز صرف 35.4 اووروں میں 188 رن بنا کر سمٹ گئی۔
آسٹریلیا کے تجربہ کار بلے باز کو تماشائیوں سے بھرے وانکھیڑے اسٹیڈیم میں شدید گرمی کے درمیان سمیع اور سراج کی جوڑی کے سامنے پانی مانگتے ہوئے دیکھا گیا۔ تجربہ کار سمیع اور نوجوان سراج کی تیز گیندوں کے سامنے مہمان بلے باز شروع سے لے کر آخر تک بے چین نظر آئے۔
اوپنر مچل مارش (81) کے علاوہ کوئی اور بلے باز کریز پر زیادہ وقت نہیں گزار سکا۔ دوسری جانب کلدیپ یادو (48 رن پر ایک وکٹ)، رویندر جڈیجہ (46 رن پر دو وکٹ)، ہاردک پانڈیا (29 رن پر ایک وکٹ) نے کنگاروں کو جمنے کا موقع نہیں دیا، جس کے نتیجے میں پوری ٹیم 188 رن بنا کر آؤٹ ہو گئی۔
ہندوستانی حملے کی دھار کا اندازہ اس بات سے لگایا جاسکتا ہے کہ آسٹریلیا کے پانچ بلے باز اپنے ذاتی اسکور کو دوہرے ہندسے تک پہنچانے میں ناکام ثابت ہوئے۔ ایک طرف وکٹوں کے گرنے کے درمیان، مارش نے اپنی 65 گیندوں کی اننگز میں پانچ لمبے چھکے اور دس چوکے مارتے ہوئے جوش و خروش کا مظاہرہ کیا۔ ان کے علاوہ کپتان اسٹیون اسمتھ (22) اور جوس انگلس (26) نے ٹیم کے اسکور بورڈ کو تیز کرنے کی ناکام کوشش کی۔
ایک وقت میں آسٹریلیا 20ویں اوور میں دو وکٹوں کے نقصان پر 129 رن کے بڑے اسکور کی جانب بڑھ رہا تھا لیکن مارش کے آؤٹ ہوتے ہی وکٹ گرنا شروع ہوگئی جو سلسلہ پوری ٹیم کے پویلین پہنچنے تک جاری رہا۔