سوپور میں سرگرم ملی ٹینٹ گرفتار

سرینگر//
شمالی کشمیر کے سوپور میں سیکورٹی فورسز نے لشکر طیبہ کے سرگرم جنگجو کو اسلحہ وگولہ بارود سمیت حراست میں لینے کا دعویٰ کیا ہے ۔
پولیس کے ایک ترجمان نے بتایا کہ سوپور پولیس اور ۲۲آر آر نے منگل کے روز سوپور کے مدینہ باغ ڈانگر پورہ گاوں کو محاصرے میں لے کر جنگجو مخالف آپریشن شروع کیا۔
ترجمان نے بتایا کہ علاقے میں محصور جنگجو نے جوں ہی حفاظتی عملے کو دیکھا تو اس نے راہ فرار اختیار کرنے کی کوشش کی تاہم سلامتی عملے نے پیشہ وارانہ صلاحیتوں کو بروئے کار لا کر بالآخر مقامی جنگجو کی گرفتاری عمل میں لائی ۔ان کے مطابق گرفتار ملی ٹینٹ کی شناخت اویس احمد میر ولد نذیر احمد ساکن وار محلہ گنڈ براتھ کے بطور ہوئی ۔
پولیس ترجمان نے مزید کہاکہ تلاشی کے دوران ملی ٹینٹ کے قبضے سے ایک پستول ‘ آٹھ راونڈ‘ پستول میگزین اور چینی گرینیڈ کے ساتھ ساتھ قابل اعتراض مواد برآمد کرکے ضبط کیا گیا۔
ترجمان نے بتایا کہ جنگجو کی گرفتاری سے ٹارگیٹ کلنگ اوردیگر تخریبی سرگرمیوں کو ناکام بنایا گیا۔