اپنے بخاری صاحب… الطاف بخاری صاحب گزشتہ تین برسوں سے ہم… ہم کشمیریوں سے اتنے وعدے کر چکے ہیں جتنے وعدے دہلی نے کشمیریوں سے گزشتہ تین صدیوں سے نہیں کئے ۔ ان جناب نے اتنے وعدے کئے کہ ان میں سے بیشتر یہ بھول بھی چکے ہوں گے اور… اور صاحب سچ تو یہ ہے کہ انہیں …ان وعدوں کو یاد رکھنے کی ضرورت بھی کیا ہے کہ … کہ بخاری صاحب ٹھہرے سیاستدان … اور انہوںنے جو وعدے کئے وہ کشمیریوں سے کئے ہیں … اس لئے ان وعدوں کو یاد رکھنے کی انہیں کوئی ضرورت بھی نہیں ہے کہ… کہ آج تک کشمیریوں سے وعدے کرنے پر کشمیریوں نے کسے پکڑ ا‘ کس کے گریبان میں ہاتھ ڈالا جو … جو اپنے بخاری صاحب کو کوئی ٹیشن ہو گی… بخاری صاحب !آپ بے فکر رہئے ‘ بغیر کسی خوف و خطر کے وعدوں پہ وعدے کئے جائے‘ہول سیل میں وعدے کیجئے… ہم بھی دیکھتے ہیں کہ کل کوآپ سے ان وعدوں کا کون حساب مانگے گا… کون ایسی گساخی کرے گا ۔آپ بے فکر ہو کر وعدے کیجئے اور ہول سیل میں کیجئے کہ… کہ یہ بھی سچ ہے کہ … کہ آپ ان وعدوں کو عملی جامہ پہنانے کے پابند بھی نہیں ہیں اور… اور اس لئے نہیں ہیں کہ… کہ آپ ان تمام وعدوں کواقتدار میں آنے سے مشروط کررہے ہیں اور… اور یہ بات آپ بھی جانتے ہیں کہ آپ اقتدار میں آنے والے نہیں ہیں… اور اس لئے نہیں ہیں کہ پھر بی جے پی کہاںجائیگی ‘ اپنے ڈاکٹر صاحب اور ان کے فرزند ارجمند کا کیا ہو گا‘ میڈم جی تو ریس میں ہے ہی نہیں … لیکن ان کے دل میں اقتدار میں آنے کی خواہش کا کریں گے کیا ؟بخاری صاحب !اس کا یہ مطلب نہیںہے اور بالکل بھی نہیںہے کہ آپ ہمت ہاریں گے… نہیں جناب آپ ایسا نہ کیجئے اور نہ ہم آپ کو ایسا کرنے کا مشورہ دے رہے ہیں… بس اتنی سی دعا کیجئے گا کہ اللہ میاں آپ کو ایک بار اقتدار میں لائے … کسی بھی طرح ‘ چور دروازے سے ہی سہی … لیکن لائے ۔لوگوں سے ‘ کشمیریوں سے وعدے پورے کرنے کیلئے نہیں بلکہ انہیں ‘ ان وعدوں کو توڑنے کیلئے… اور ایک بار جب آپ اپنے وعدے توڑیں گے‘ انہیں پورا نہیں کریں گے … اللہ میاں کی قسم اُس دن لوگ… کشمیر کے لوگ آپ کو سیاستدان سمجھیں گے… ایک سنجیدہ اور پختہ سیاستدان ۔ ہے نا؟