چلئے صاحب یہ پروپیگنڈا بھی دم توڑ گیا… اپنی موت آپ مرگیا اور… اور اس کا سہرا اگر کسی کو جاتا ہے تو… تو اپنے ایل جی صاحب کو جاتا ہے… کسی اور کو نہیں‘ بالکل بھی نہیں ۔ایل جی صاحب نے جو کہا ‘ یوں تو یہ بات اور بھی کئی لوگوں نے کہی تھی… لیکن وہ سب چھوٹے لوگ تھے جو چھوٹے منہ بڑی بات کرتے تھے‘لیکن… لیکن جب یہی بات ایل جی صاحب نے کی تو… تو اس کا مطلب یہ ہوا کہ … کہ اب واقعی میں ایسا ہونے والا ہے ۔ ایل جی صاحب نے پاکستان کے زیر قبضہ کشمیر کو بھارت کااٹوٹ انگ قرار دیا ہے… اور ساتھ میں یہ بھی کہا ہے کہ …کہ اس حوالے سے پارلیمنٹ کی قرار داد کی شکل میں جو وعدہ کیا گیا تھا ‘ اسے جلد پورا کیا جائیگا … اسے جلد عملی شکل دی جائیگی ۔ ہمیں یقینا ایل جی صاحب کی بات پر یقین ہے اور… اور اس بات پر بھی کہ مودی جی کے ہو تے کچھ بھی ممکن ہے …لیکن … لیکن ہمیں اس پر بات نہیں کرنی ہے… بات اس پروپیگنڈا پر کرنی ہے جو کیا جارہا ہے … یہ پروپیگنڈ کہ ۵؍اگست ۲۰۱۹ کے دن جو کچھ بھی ہوا … اس کا صرف ایک ہی مقصد ہے اور… اور وہ یہ کہ مسلم اکثریتی کشمیر کو مسلم اقلیتی کشمیر میں بدل دینا… کہنے والوں کا کہنا تھا کہ مودی جی کو ۳۷۰ یا ۳۵؍ اے میں کوئی دلچسپی نہیں تھی‘ دلچسپی اگر تھی ‘اگر ہے تو… تو وادی کو مسلم اقلیتی کشمیربنانے میں ہے…اور صاحب یہی پروپیگنڈا کیا جارہا ہے… یہی بہتان لگایا جارہا ہے… ایسا پروپیگنڈا ‘ ایسا بہتان جسکی کوئی حقیقت نہیں … اور بالکل بھی ۔ اور ایل جی صاحب نے جو کہا انہوں نے ثابت بھی کردیا کہ… کہ یہ محض ایک پروپیگنڈا ہے اور… اور کچھ نہیں ۔اور اس بات کو سمجھنے کیلئے اپنے دماغ پر زیادہ زور دینے کی بھی کوئی ضرورت نہیں ہے… پاکستان کے زیر قبضہ کشمیر کی آبادی تقریباً۴۰لاکھ ہے اور… اور یہ چالیس کے چالیس لاکھ اللہ میاں کے فضل وکرم سے مسلمان ہیں… جب پاکستان کا زیر قبضہ کشمیر بھی اپنے کشمیر کے ساتھ مل جائیگا اور… اور جلد مل جائیگا تو… تو یہاں کی مسلم آباد میں مزید چالیس لاکھ کا اضافہ ہوگا… چالیس لاکھ کا اور یہ کوئی چھوٹی موٹی تعداد نہیں ہے اور… اور بالکل بھی نہیں ہے ۔اور کچھ لوگ ہیں جو مرکزپر کشمیری مسلمانوں کواقلیت میں بدلنے کا بے ہودہ اور احمقانہ الزام لگاتے ہیں… احمق کہیں کے ۔ ہے نا؟