بچیوں کو ہراساں کرنے پر ڈرائیونگ لائسنس معطل‘ گاڑی کی رجسٹریشن منسوخ ہو گی

سرینگر//
آر ٹی او کشمیر ‘سید شہنواز نے بچیوں کو ہراساں کرنے اور فقرے کسنے والوں کے خلاف مہم شروع کرنے کی بات کرتے ہوئے کہا کہ ایسے افراد کی نہ صرف لائسنسزمعطل کی جائیں گی بلکہ ان کی گاڑیوں کی رجسٹریشن کو بھی منسوخ کیا جائے گا۔
ان باتوں کا اظہار آر ٹی او کشمیر سید شہنواز نے نامہ نگاروں سے بات چیت کے دوران کیا۔
شہنواز نے کہاکہ ڈلگیٹ میں دوشیزہ کو ہراساں کرنے کی پادائش میں جن دو لڑکوں کو سکوٹی سمیت حراست میں لیا گیا اْن کی سکوٹی کی رجسٹریشن منسوخ کی گئی۔انہوں نے مزید بتایا کہ اْن موٹر سائیکل سواروں کے خلاف اب سخت کارروائی ہوگی جو کرتب بازی کے ساتھ ساتھ تیز رفتاری کے ساتھ بائیک اور موٹر سائیکل چلاتے ہیں۔
آر ٹی او کے مطابق محکمہ کی جانب سے اس حوالے سے ایک خصوصی مہم شروع کی جارہی ہیں۔انہوںنے کہا کہ تیز رفتاری کے ساتھ موٹر سائیکل اور گاڑیاں چلانے والوں کی اب رجسٹریشن کے ساتھ ساتھ لائسنس بھی منسوخ کی جائیں گی۔
شہنواز نے مزید بتایا کہ سرینگر کے پرے پورہ باغات میں تیز رفتاری کے ساتھ گاڑیاں اور موٹر سائیکل چلانے کی مسلسل شکایتیں موصول ہو رہی ہیں۔انہوں نے کہاکہ دوشیزاوں کو تنگ طلب کرنے اور اْن پر فقرے کسنے والوں کے خلاف پولیس کارروائی کر رہی ہے لیکن اس حوالے سے بیداری مہم بھی شروع کرنے کی ضرورت ہے۔
آر ٹی او کشمیر نے کہاکہ اساتذہ اور والدین پر خاص ذمہ داری ہے کہ وہ طلبا اور بچوں کو اس بارے میں آگاہی فراہم کریں۔انہوں نے کہا’’ کرتب بازی اور تیز رفتاری کے ساتھ موٹر سائیکل اور گاڑیاں چلانے والوں کے بارے میں اگر کوئی بھی شکایت موصول ہوتی ہے تو اْن کی رجسٹریشن اور لائسنس کو اب منسوخ کیا جائے گا۔‘‘