’نظریاتی اور مالی مدد فراہم کرنے والوں کو بے اثر کیاجائیگا‘

کٹھوعہ//
دہشت گردی کے خلاف جنگ میں جموں کشمیر پولیس کے کردار کی تعریف کرتے ہوئے‘ لیفٹیننٹ گورنر منوج سنہا نے جمعہ کو مرکز کے زیر انتظام علاقے میں دہشت گردوں کو ’نظریاتی اور مالی‘ مدد فراہم کرنے والے ماحولیاتی نظام کو ختم کرنے پر زوردیا۔
سنہا نے کہا کہ یہ جموں و کشمیر انتظامیہ کا مقدس فرض ہے کہ وہ عام آدمی کو محفوظ اور صحیح ماحول فراہم کرے۔
لیفٹیننٹ گورنرآج کٹھوعہ کے ایس پرتھن نندن سنگھ پولیس ٹریننگ سکول میں۲۹ ویں بی آر ٹی سی بیچ کے ریکروٹ کا نسٹیبلوں کی اٹیسٹیشن کم پاسنگ آئوٹ پریڈ میں شرکت کررہے تھے ۔
سنہا نے کہا’’ جموںوکشمیر پولیس کی دیانتداری ، لگن او رپیشہ ورانہ مہارت دہشت گردی کے خلاف جنگ میں اہم ہے ۔ہم سب کو جموںوکشمیر پولیس کی طرف سے منشیات کی دہشت گردی سے نمٹنے اور قانون کی حکمرانی کو نافذ کرنے میں نمایاں کارکردگی اور پیشہ ورانہ مہارت پر فخر ہے۔‘‘
لیفٹیننٹ گورنر نے داخلی سلامتی کے چیلنجوںسے نمٹنے کیلئے مستقبل کے تیار پولیسنگ کی حکمت عملی پر زور دیا۔
سنہا نے کہا’’ یہ ہماری پولیس فورسز کیلئے مشکل وقت ہیں کیوں کہ آج دُنیا کو روایتی اور غیر روایتی خطرات کا سامنا ہے ۔ ہمیں دہشت گردوں کو نظریاتی اور مالی مدد فراہم کرنے والے ماحولیاتی نظام کو ختم کرنے کیلئے چوکس اور پُر عزم رہنے کی ضرورت ہے ۔‘‘انہوں نے کہا کہ ایک مہذب معاشرے میں تخریبی عناصر کے لئے کوئی جگہ نہیں ہے ۔
لیفٹیننٹ گورنر نے کہا کہ آج نارکو دہشت گردی معاشرے کیلئے سب سے بڑے خطرات میں سے ایک بن چکی ہے ۔جموںوکشمیر یوٹی اِنتظامیہ ، جموںوکشمیر پولیس اور ہماری سیکورٹی فورسز منشیات اور دہشت گردی کے چیلنجوں سے جامع اَنداز میں نمٹنے کے لئے پُر عزم ہے۔اُنہوں نے کہا کہ عام آدمی کی اُمنگوں کو پورا کرنے کے لئے محفوظ اور صحیح ماحول فراہم کرنا ہمارامقدس فرض ہے۔
سنہا نے اِس بات کو نوٹ کرتے ہوئے کہا کہ بیچ میں اعلیٰ عہدے خواتین کانسٹیبلوں نے حاصل کئے ہیں۔اُنہوں نے کہا کہ یہ کامیابیاں ظاہر کرتی ہے کہ ہمار ی خواتین کسی سے کم نہیں ہیں۔
لیفٹیننٹ گورنر نے ڈی جی پی دِلباغ سنگھ سے مزید کہا کہ وہ پولیس فورس میں خواتین کیلئے ریزرویشن کے کوٹہ کو بڑھانے پر غور کریں۔
ڈی جی پی دِلباغ سنگھ نے نئے بھرتیوں کے لئے نیک خواہشات کا اِظہار کیا۔ اُنہوں نے مزید کہا کہ آپ نے اَپنی تربیت کے دوران جو مہارتیں ، علم ، اَقدار حاصل کی ہیں وہ اِس عظیم پیشے میں آپ کی کیریئر کی بنیاد کے طور پر کام کریں گی۔
ڈی جی پی نے پولیس کی جدید کاری میں مسلسل تعاون کے لئے جموںوکشمیر یوٹی اِنتظامیہ کا شکریہ اَدا کیا۔
ایس پی ایس پی ٹی ایس کٹھوعہ کے پرنسپل روپ راج نے تربیتی کورس کے دوران مختلف خصوصی ماڈیولز اور دیگر سرگرمیوں پر تربیتی پروگرام کے بارے میںبتایا۔
پاس آئوٹ ہونے والے کیڈٹس سے اَپنے فرائض محنت اور دیانتداری سے سر اَنجام دینے کا حلف لیا گیا۔
لیفٹیننٹ گورنر نے راشٹریہ سلامی لی اور شاندار پریڈ اور مارشل آرٹ کا مظاہرہ دیکھا ۔اُنہوں نے تربیتی کورس کے دوران بہترین کارکردگی کا مظاہرہ کرنے والے کیڈٹس کو بھی مبارک باد دی۔
آر / سی ٹی سنالی بھگت بہترین آل رائونڈر بن کر اُبھریں ۔لیفٹیننٹ گورنر نے ریکروٹ کانسٹیبلوں محترمہ سرلین کور، محترمہ سپنا سینی، محترمہ ہینا چودھری اور محترمہ نیتیکارا جپوت کو ان کی بہترین کارکردگی کے لئے اعزاز سے نوازا۔
پی ٹی ایس کٹھوعہ میں کل ۴۸۰ نئے بھرتی ہوئے جن میں ۴۹ خواتین بھرتی کانسٹیبل شامل ہیں ، نے آج اَپنی سخت تربیت مکمل کی ہے ۔ ۴۸۰ میں سے ۳۳۰ کانسٹیبل پہلے ہی ایس پی اوز ، ۳۲پیرو کاروں کے طور پر اور ۸۵کو ایس آر او کے تحت تعینات کیا گیا ہے۔
اِس موقعہ پر سینئر سروس اور ریٹائرڈ پولیس و آرمی کے اہلکار ، پی آر آئی نمائندے اور پاس آئوٹ ہونے والے کیڈٹس کے کنبے کے اَفراد موجود تھے۔