کٹھوعہ //
لیفٹیننٹ گورنر نے اس عزم کو دہرایا ہے کہ پراپرٹی ٹیکس اور انسداد تجاوزات مہم میں عام آدی کے مفادات کو تحفظ فراہم کیا جائیگا ۔
لیفٹیننٹ گورنر(ایل جی)آج کٹھوعہ کے ایس پرتھن نندن سنگھ پولیس ٹریننگ سکول میں۲۹ ویں بی آر ٹی سی بیچ کے ریکروٹ کا نسٹیبلوں کی اٹیسٹیشن کم پاسنگ آئوٹ پریڈ میں شرکت کررہے تھے ۔
سنہا نے پراپرٹی ٹیکس اور اِنسداد تجاوزات مہم پر بات کرتے ہوئے کہا کہ اِنتظامیہ عام آدمی کے مفادات کے تحفظ کے لئے پُر عزم ہے۔
ایل جی نے کہا کہ انہیں اس بات کی خوشی ہے کہ انسداد تجاوزات مہم کے دوران کسی عام آدمی کو چھوا نہیں گیا ۔انہوں نے کہا کہ یہ سچ ہے کہ’’ہمیں اس مہم کے دوران بڑی مقداد میں زمین ملی ہے ۔آج میں یہ کہنا چاہتا ہوں کہ یہ زمین نوجوانوں کو کھیلنے کیلئے دی جائیگی ۔اس زمین پر اثر و رسوخ والوں نے غیر قانونی قبضہ کیا تھا اور اب اس زمین پر بچوں کیلئے اسکول اور کالیج تعمیر ہوں گے ۔وہاںلوگوں کے علاج کیلئے ہسپتال بنیں گے ‘اس کے علاوہ جموں کشمیر کے لوگوں کو جو دیگر سہولیات چاہئیں وہ اس زمین پر بنائی جائیں گی ‘‘۔
سنہا نے کہا کہ اُنہوں نے مزید کہا کہ اِس بات کو یقینی بنایا جارہا ہے کہ اِنسداد ِتجاوزات مہم کے دوران کوئی غریب متاثر نہ ہو۔
ایل جی نے کہا کہ جموںوکشمیر میں پراپرٹی ٹیکس ملک میں سب سے کم ہوگا ۔انہوں نے کہا کہ اس پر بھی بہت ساری باتیں ہو رہی ہیں ۔ انہوں نے کہا کہ پرا پرٹی ٹیکس ملک کے ہر شہر اور ہر ریاست میں لاگو ہے ۔ان کاکہنا تھا’’یہ ٹیکس جموں کشمیر میں سب سے آخر پر لگا ہے ۔یہ ٹیکس عائد کرتے وقت بھی اس بات پر سوچ بچار کیا گیا کہ سب سے کم ٹیکس عاید کیا جائے ‘‘۔
لیفٹیننٹ گورنر نے زراعت ، صنعتوں اور سیاحت جیسے شعبوں میں رجسٹرڈ ہونے والی پیش رفت کو بھی شیئر کیا۔