نئی دہلی// مرکزی وزارت کھیل کے مشن اولمپک سیل (ایم او سی) نے دو بار کی اولمپک میڈلسٹ پی وی سندھو کے کوچ ودھی چودھری اور فٹنس ٹرینر سری کانت ماداپلی کو سندھو کے ساتھ آل انگلینڈ چمپئن شپ، سوئس اوپن اور اسپین ماسٹرز میں جانےکی منظوری دے دی ہے۔
وزارت نے جمعرات کو جاری کردہ ایک ریلیز میں کہا کہ ایم او سی ، ودھی اور سری کانت کے سفر کا خرچ اٹھانے کے ساتھ ساتھ انہیں دیگر چیزوں کے علاوہ یومیہ الاؤنس بھی فراہم کرے گا۔
سندھو نے گزشتہ ہفتے کوچ پارک تائی سانگ کے ساتھ کانٹریکٹ ختم کر دیا تھا ۔ انہوں نے فی الحال کسی بھی کوچ کے ساتھ اپنی وابستگی کا باضابطہ اعلان نہیں کیا ہے۔ ودھی نے مکسڈ ایشین چیمپئن شپ 2023 میں سندھو کی کوچنگ کی تھی ۔ اب وہ 19 مارچ سے شروع ہونے والی آل انگلینڈ چیمپئن شپ سے سندھو کے کوچ کا عہدہ سنبھالیں گے۔
دریں اثنا، ایم او سی نے جمعرات کی میٹنگ میں ہندوستانی شوٹر اور عالمی چمپئن شپ میڈلسٹ انیش بھان والا کو جرمنی میں ریلف شومن کے ساتھ ٹریننگ کی بھی اجازت دی۔