نئی دہلی//) ہندوستان کی ٹاپ بیڈمنٹن کھلاڑی پی وی سندھو اور ان کے کوچ پارک ٹے سانگ الگ ہوگئے ہیں۔
کوچ پارک نے جمعہ کو سوشل میڈیا پر یہ جانکاری دی۔
پارک نے انسٹاگرام پر ایک پیغام شیئر کرتے ہوئے کہا کہ ’انہوں نے حالیہ تمام میچوں میں مایوس کن کارکردگی کا مظاہرہ کیا ہے اور بطور کوچ میں خود کو ذمہ دار سمجھتا ہوں۔وہ بدلاؤ چاہتی تھیں اور (انہوں نے) کہا کہ وہ نیا کوچ تلاش کریں گی۔ میں نے ان کے فیصلے کا احترام کرتے ہوئے اس پر عمل کرنے کا فیصلہ کیا۔‘‘
ذرائع کے مطابق سندھو مارچ میں ہونے والی آل انگلینڈ اوپن بیڈمنٹن چیمپئن شپ کی تیاری کے لیے ملائیشیا کے سابق کھلاڑی حافظ ہاشم کے ساتھ ٹریننگ کر سکتی ہیں۔
کوچ پارک نے 2019 میں دو بار کی اولمپک میڈلسٹ سندھو کے ساتھ کام کرنا شروع کیا تھا۔ سندھو نے ٹوکیو اولمپکس 2020 میں کانسی کا تمغہ جیتا تھا اور برمنگھم کامن ویلتھ گیمز 2022 میں سونے کا تمغہ کا تمغہ حاصل کیا تھا۔
کامن ویلتھ گیمز میں ٹخنے میں فریکچر ہونے کے بعد سندھو تقریباً پانچ ماہ تک بیڈمنٹن سے دور ہوگئی تھیں۔ وہ جنوری میں منعقدہ ملائیشیا اوپن 2023 کے ذریعے کورٹ میں واپس آئیں لیکن وہاں انہیں پہلے مرحلے میں شکست کا سامنا کرنا پڑا۔ سندھو نے گھریلو سرزمین پر انڈیا اوپن میں بھی حصہ لیا تھا لیکن یہاں بھی وہ پہلے مرحلے سے آگے نہیں بڑھ سکیں۔
پارک نے کہا ’’مجھے افسوس ہے کہ میں اگلے اولمپکس تک ان کے ساتھ نہیں رہ سکوں گا، لیکن فی الحال میں انہیں دور سے سپورٹ کروں گا۔‘‘