ویلنگٹن// انگلینڈ کے ٹیسٹ کپتان اور تجربہ کار آل راؤنڈر بین اسٹوکس نے تصدیق کی ہے کہ وہ جون میں آئرلینڈ کے خلاف شروع ہونے والے ٹیسٹ اور آسٹریلیا کے خلاف ایشز ٹیسٹ سیریز کی تیاری کے لیے انڈین پریمیئر لیگ (آئی پی ایل) سے جلد رخصت لے لیں گے۔
واضح رہے کہ انڈین پریمیئر لیگ کا آغاز 31 مارچ سے ہوگا جبکہ ٹورنامنٹ کا فائنل 28 مئی کو کھیلا جائے گا۔ اسٹوکس کی ٹیم موسم گرما کے ٹیسٹ سیزن کا آغاز یکم جون کو آئرلینڈ کے خلاف ٹیسٹ کے ساتھ کرے گی، جس کے بعد اسے پانچ ٹسٹ میچوں میں اپنے روایتی حریف آسٹریلیا کا سامنا کرنا ہے۔
اسٹوکس نے یہاں نامہ نگاروں سے کہا کہ ہاں میں (آئرلینڈ کے خلاف ٹیسٹ) کھیلوں گا۔ میں اس بات کو یقینی بناؤں گا کہ جب میں آئرلینڈ کے خلاف ٹیسٹ کھیلنے سے پہلے وطن واپس آؤں گا تو میں اپنے آپ کو مناسب وقت دے سکوں۔
واضح رہے کہ چنئی سپر کنگز نے 16.25 کروڑ روپے کی لاگت سے اسٹوکس کو اپنی فرنچائز میں شامل کیا ہے۔ اسٹوکس آئی پی ایل کے آخری سیزن میں شامل نہیں ہوئے تھے، حالانکہ انہوں نے پاکستان کے خلاف حالیہ ٹیسٹ سیریز کے بعد ٹورنامنٹ میں کھیلنے میں دلچسپی ظاہر کی تھی۔