کشمیر بدل گیا ہے ‘امن پوری طرح سے واپس لوٹ آیا ہے:پرمانک

سرینگر///
مرکزی وزیر مملکت نساتھ پرمانک نے منگل کے روز کہاکہ کشمیر اب بدل گیا ہے اور یہاں کے نوجوان کھیل کود کی سرگرمیوں میں بڑھ چڑھ کر حصہ لے رہے ہیں۔انہوں نے کہا کہ کشمیر کا نوجوان ہر شعبے میں ملک کا نام روشن کر رہا ہے۔
ان باتوں کا اظہار کھیل کے مرکزی وزیر نے گلمرگ میں ونٹر گیمز کے اختتامی تقریب کے بعد نامہ نگاروں سے بات چیت کے دوران کیا۔
مرکزی وزیر مملکت نے کہاکہ امسال کھیلو انڈیا میں ملک بھر سے آئے ہوئے لگ بھگ دو ہزار کھلاڑیوں نے شرکت کی۔انہوں نے بتایا کہ ونٹر سپورٹس نے پچھلے برسوں کے سبھی ریکارڈ توڑ دئے ہیں۔اْن کے مطابق سیاحتی مقام گلمرگ میں ہوٹل والوں کے پاس جتنے بھی کمرے تھے وہ پوری طرح سے بک تھے لیکن کھیلو انڈیا کے پیش نظر ہوٹل والوں نے کھلاڑیوں کیلئے کمرے دستیاب رکھیں۔
مرکزی وزیرنے مزید بتایاکہ کشمیر اب بدل گیا ہے اور یہاں پر امن پوری طرح سے واپس لوٹ آیا ہے۔انہوں نے کہا کہ کشمیر کے کھلاڑیوں میں صلاحیتوں کی کوئی کمی نہیں اور انہوں نے اپنا لوہا ہر ایک پلیٹ فارم پر منوایا ہے۔
پرمانک کے مطابق وزیر اعظم نریندرمودی نے جموں وکشمیر کے کونے کونے میں تعمیر و ترقی کے کام شروع کئے اور اس حوالے سے مزید اقدامات اْٹھائے جارہے ہیں۔
مرکزی وزیر مملکت کے مطابق کشمیر کے نوجوانوں کو اب ہر شعبے میں آگے بڑھنے کا بھر پور موقع فراہم کیا جارہا ہے او ر وہ ملک کا نام روشن کر رہے ہیں۔انہوں نے مزید بتایا کہ کھیلو انڈیا ونٹر گیمز آج اختتام پذیر ہوئے اور اس میں لگ بھگ دو ہزار کھلاڑیوں نے شرکت کی اور کھلاڑیوں نے اپنے ہی ریکارڈ توڑے۔