پلوامہ میں جیش محمد کے دو جنگجو معاونین گرفتار

سرینگر//
پولیس نے جنوبی کشمیر کے ضلع پلوامہ میں جیش محمد سے وابستہ دو جنگجو اعانت کاروں کو گرفتار کرکے ان کی تحویل سے اسلحہ و گولہ بارود بر آمد کرنے کا دعویٰ کیا ہے ۔
ایک پولیس ترجمان نے تفصیلات فراہم کرتے ہوئے کہا کہ پلوامہ علاقے میں ہتھیاروں کی ترسیل کے متعلق ایک مخصوص اطلاع موصول ہونے پر پلوامہ پولیس اور فوج کی۵۵آر آر کی ایک مشترکہ ٹیم تشکیل دی گئی اور انہیں مختلف مشکوک مقامات پر خفیہ انداز میں تعینات کر دیا گیا۔انہوں نے کہا کہ پولیس اسٹیشن لتر کے حد اختیار میں آنے والے نائینہ بٹ پورہ علاقے میں سکوٹی پر سوار دو مشکوک افراد کو بیگ لے کے گھومتے دیکھا گیا۔
ان کا کہنا تھا’’خفیہ ٹیم نے کارروائی انجام دیتے ہوئے دونوں کو پکڑ کر ان کی تحویل سے اسلحہ و گولہ بارود بر آمد کیا‘‘۔
بیان میں کہا گیا’’مشتبہ افراد میں سے ایک نے اپنا نام شوکت احمد ڈگو ولد عبدالوہاب ڈگو ساکن نینہ جو پیشے سے ایک ڈرائیور ہے ، کے طور پر ظاہر کیا دوسرا اس کا قریبی رشتہ دار ہے جو نو عمر لڑکا ہے ، وہ سیٹھار کا رہنے والا ہے ‘‘۔
پولیس بیان میں کہا گیا’’شوکت احمد نے پوچھ تاچھ کے دوران انکشاف کیا کہ وہ سینٹرل جیل راجوری میں بند جنگجو اعانت کار فردوس احمد بٹ ولد عبدالاحد بٹ ساکن نائینہ کے ساتھ رابطے میں تھا‘‘۔
پولیس ترجمان نے کہا کہ شوکت احمد جیش محمد نامی جنگجو تنظیم کے لئے کام کرتا تھا اور جو اسلحہ و گولہ بارود اس کی تحویل سے بر آمد کیا گیا وہ اس کو علاقے میں تقسیم کرنا تھا تاکہ پولیس اور سیکورٹی فورسز پر حملے انجام دئے جاسکیں۔
بیان کے مطابق بر آمد شدہ اسلحہ و گولہ بارود میں ۲۵چینی گرینیڈ‘ ایک پستول‘دو پستول میگزین‘۲۳۰پستول کارٹریج‘۱۰؍اے کے میگزین اور۳۰۰؍اے کے کارٹریج شامل ہیں۔