نئی دہلی//ہندوستان کے باصلاحیت وکٹ کیپر بلے باز رشبھ پنت کو جمعہ کے روز دسمبر میں سڑک حادثے کے بعد پہلی بار پیدل چلتے ہوئے دیکھا گیا۔
پنت نے سوشل میڈیا پر اپنی دو تصاویر شیئر کی ہیں جس میں وہ بیساکھیوں کی مدد سے چلتے ہوئے نظر آرہے ہیں اور ان کی ٹانگ میں پلاسٹر لگا ہوا ہے۔
پنت نے اس پوسٹ پر کیپشن لکھا، ’’ایک قدم آگے، ایک قدم مضبوط، ایک قدم بہتر‘‘۔
قابل ذکر ہے کہ پنت دسمبر 2022 میں روڑکی میں اپنے گھر جاتے ہوئے ایک سڑک حادثے میں بال بال بچ گئے تھے۔
تب سے، پنت کی متعدد سرجری ہوئی ہیں اور وہ مکمل طور پر صحت یاب ہونے تک بی سی سی آئی کی نگرانی میں رہیں گے۔ اس سے قبل پنت نے سوشل میڈیا پر ایک پوسٹ میں اپنی سرجری کی کامیابی کی تصدیق کی تھی۔
پنت نے ٹویٹ کیا، "میں تمام تعاون اورنیک خواہشات کے لیے شکرگزار ہوں۔ مجھے یہ بتاتے ہوئے خوشی ہو رہی ہے کہ میری سرجری کامیاب رہی۔ صحت یابی کا سفر شروع ہو گیا ہے اور میں آنے والے چیلنجوں کے لیے تیار ہوں۔” میں بی سی سی آئی ، جے شاہ اور سرکاری افسران کا شکرگزار ہوں ۔”